Recientemente Gobierno a anuncia cu nan a tuma e decision pa pospone introduccion di BTW na 2023. Na mes momento a anuncia cu lo bay aumenta BBO cu 1% of 1,5%, cual ta necesario pa genera e entradanan necesario pa por sigui maneha y inverti den nos pais, mehora nos situacion financiero y logra e recuperacion cu tanto nos tur ta anhela.
Intencion di Gobierno, y conforme Landspakket, introduccion di BTW lo mester a tuma luga entrante 1 di januari 2023. For di presentacion ricibi den Parlamento for di Minister Xiomara Maduro y e comision di experto, por keda conclui cu BTW lo ta un sistema fiscal mas agil y husto. Door di su introduccion y e reforma fiscal den su totalidad lo pone e base necesario pa haci esaki posibel y na mes momento genera entrada (fiscal) sostenibel. E comision a traha hopi duro y e plan den su totalidad ta cla pa ehecucion. Lastimamente desaroyonan mundial y preocupacionnan di e gremionan pa loke ta trata su implementacion y su impacto a conduci cu Gobierno a dicidi pa pospone e fecha di introduccion stipula.
Mi ta haya e decision pa pospone e BTW uno responsabel mirando loke e calculonan ta indica encuanto e efecto inflatorio di su introduccion. Segun Gobierno e efecto inflatorio di e aumento di 1% di BBO lo ta mucho mas abou cu esun di introduccion di BTW. Gobierno ta indica cu BTW su efecto inflatorio ta casi 4 of 5 biaha mas halto cu aumento di BBO.
Mirando e situacion ya caba na e momenton aki a consecuencia di e pandemia y e guera na Ucrania mi no ta haya prudente pa añadi e efecto inflatorio extra cu e BTW lo ocasiona. Como Parlamentario mi ta di opinion cu na e momentonan aki ta hopi importante pa proteha nos hendenan mas cu por y tene cuenta cu e impacto di cualkier decision riba nan cartera. Cu e decision aki Gobierno por scapa pueblo di mas inflacion y preveni cu costo di bida ta aumenta mucho mas ainda.
No obstante tur preocupacion mi ta contento cu prijs di gasoline a cuminsa baha y tambe di mira cu Gobierno ta trahando pa baha prijs di awa y coriente bek cu recientemente a subi temporalmente. Pasobra e aumento di costo di bida door di desaroyonan mundial a consecuencia di e pandemia y e guera na Ucrania tin sigur hopi di nos preocupa. Tur producto y comestibel nan prijs a aumenta y p’esey mes mi ta haya bon cu Gobierno a cuminsa entre otro papia cu e supermercadonan pa sondea e posibilidad pa baha prijs (reduci nan margen di ganashi).
Cos berdad ta dificil na e momentonan aki pero como Parlamentario mi ta optimista cu pronto cos lo bira mihor. Trahando hunto, den dialogo y bon comunicacion y poniendo e ser humano central na tur momento pronto nos lo pone Aruba bek riba pia.
