Parlamentario Setty Christiaans-Yarzagaray (MEP) a señala riba e peticion cu a bay rond pa firma pa asina bin cu adaptacion di ley, y na prome luga kier enfatisa cu tin ley pa loke ta trata e situacion di cacho riba nos isla. No solamente hondenverordening, pero wetboek van strafrecht, cual ta indica e straf cu hende ta haya. E ehecucion di esaki no ta den man di parlamento of gobierno, pero logicamente nan t’ey pa scucha kico ta e necesidadnan n’e momentonan aki.
TRECE CAMBIO DEN LEY ACTUAL
“No solamente hende ta pidi adaptacion di ley, comparacion cu Hulanda – cual tambe nos a tuma nota con Hulanda a haci adaptacion den castigo aña pasa, hisa castigo, hista boet. Dus nos tambe tin e oido p’e grupo aki nos ta trahando ariba esaki,” segun Christiaans-Yarzagaray. Minister di Naturalesa tambe ta trahando riba e parti aki via un dierenwelzijn cual ta un otro ley, y logicamente lo sa cu lo acapara mas aspecto cu solamente cacho.
“Mester reglamenta e parti di pushi y tur bestianan cu ta forma parti di nos cas.” No ta trata solamente e parti di maltrato pero tambe negligencia. Na Hulanda e aspectonan di ley ta tene cuenta pa castigo riba ambos di e puntonan aki. Locual Christiaans-Yarzagaray kier a laga como mensahe ta cu e ta keda na nos como comunidad pa wak y condena, pero tambe raporta esaki pa asina logra yega na miho control.
“Esaki ta cuminsa na cada un den comunidad, pa nos ta consciente y raporta na instancianan corecto.”
Tin centro di control di cacho pero tambe polisnan den bario cu por raporta esakinan segun e parlamentario ta subraya, y si nan no tin oido sigur e instancianan y fundacionnan cu ta trahando pa hopi aña lo sa e caminda. Di parti di parlamento nan ta bisa cu nan tin oido y ta awor comparando e ley cu esun di Hulanda, pero ta keda enfatisa cu ta disponibel pa scucha tur punto y haci cambio necesario. Pero esaki ta e parti di legislacion, e parti di ley, ainda falta parti di ehecucion y control. “Aki ta unda comunidad tambe por fungi manera den caso di Khalisee, comunidad a wak y raporta, cu e tabata hopi laat e ta duel nos den nos curason pa wak locual a sosode. Pero mi ta kere mescos hopi aspecto den ley, mescos cu trafico, si no tin control, lo kibra ley.”
