Setar a firma un acuerdo cu Stichting Katholiek Onderwijs Aruba (SKOA) pa asina diesshete scol por haya Fiber Optic. Ta cuminsa awo cu diesshete scol, pero despues tur scol lo tin internet lihe. Cu esaki SKOA por prepara tanto e alumnonan como docente pa digitalisacion.
Den e ultimo dianan Setar ta instalando Fiber Optic pa tur cas. A cuminsa na Noord p’e proximo dia- y añanan cu ta bin, nan ta bay den tur bario. ir. Roland Croes, director di Setar, a splica cu nan intencion ta pa pone tur hende riba e parti mas moderno cu ta e Fiber Optic na tur cas. Intencion di esaki ta p’e clientenan di Setar yega n’e speed di dies gb pa seconde pasobra ta calcula cu tur hende ta uza un gb pa seconde na cas.
Pa hopi aña Setar ta trahando cu fiber y p’esey a bay mira ki contribucion nan por haci p’e comunidad. Algo cu nan por haci pa un termino largo ta contribui n’e enseñansa di Aruba. Enseñansa ta un cos mas importante p’un comunidad y ta crea conocemento, pero tambe ta crea hende critico, cu ta compronde, ta traha hunto p’un pais. Esey ta importante, segun Croes.
E director ta kere contribuyendo cu esey Setar ta yuda e desaroyo di Aruba. Esey a pone cu nan a acerca diferente fundacion, diferente organisacion, pasobra enseñansa di Aruba ta parti den diferente fundacion. Esun prome cu a firma tabata SKOA. El a gradici e directora di SKOA p’e oportunidad aki, pero despues lo firma tambe cu Directie Publieke Scholen (DPS). Ya caba tin algun scol cu ta haciendo uzo dje Fiber Optic.
Anuesca Bailey, directora di SKOA, a indica cu nan a tuma cu man habri e oportunidad cu Setar ta ofrece nan y a dicidi p’e scolnan. Awo ta cuminsa diesshete scol, pero ainda falta pasobra total tin 46 scol. Ta cuminsa awo cu diesshete, pero pa otro aña tur ta acapara cu e Fiber Optic, esey kiermen mas miho calidad pa loke ta digitalisacion den e klasnan.
SKOA ta sumamente contento cu esaki, pasobra tin ora ta fastioso pa comunica cu e scolnan. Asina ey ta bay over na IP PBX Box y tin contacto cu e scolnan, y primordialmente baha gasto. Asina ey por tin e scolnan mas miho informa y vice versa. Cu esaki nan por prepara pa futuro tanto e alumnonan como docente p’e parti di digitalisacion y den e caso akinan cu internet mas lihe.
mr. Geoffrey Wever, Minister di Asuntonan Economico, Comunicacion y Desaroyo Sostenibel, a haya e momento aki uno bunita, pasobra Setar como empresa estatal cu semper a contribui na haci Aruba digitalmente up to par manera ta mira internacionalmente. Pa scoge un fundacion cu ta traha, SKOA, cu e scolnan, cu enseñansa ta asina importante como e prome cu ta participa den e proyecto aki pa haya acceso na miho y speed mas halto. E mandatario ta haya cu esaki ta algo positivo y ta contento cu esey.
El a gradici gerencia pa e vision, tambe na e empleadonan di Setar p’e trabou duro pa por a yega eynan.
