SETAR ta orguyoso pa anuncia e lansamento di su red LTE Cat M1, un red importante pa transformacion digital na Aruba y pa e desaroyo di solucionnan di Internet of Things (IoT).
LTE Cat M1 ta un tecnologia di celular low-power y cu un cobertura amplio, diseña specificamente pa aparatonan y aplicacionnan di IoT. Un red apart riba SETAR su red di 4G LTE cu ta ofrece conectividad confiabel, miho cobertura den edificio, consumo minimo di bateria y cu ta sostene aparatonan cu ta rekeri transmision eficiente di cantidad limita di data, haciendo e ideal pa diferente solucionnan conecta cu lo permiti mas aparato y sistemanan pa comunica automaticamente via Internet.
Cu e lansamento aki, SETAR ta brinda e sector comercial y innovadornan e oportunidad pa crea solucionnan inteligente cu por aumenta eficiencia, productividad y innovacion den diferente sector. E prome producto cu SETAR a lansa riba e red aki ta e solucion nobo SETAR Fleet Management den colaboracion cu Geotab pa maneho di wagenpark.
Otro aplicacionnan cu por benificia di e red di LTE Cat M1 ta, e.o.:
- Solucionnan di Smart City
- Wearables y devicenan medico personal
- Sistemanan di remote monitoring
SETAR, como nos compania nacional di telecomunicacion, ta mira e red aki como e fundeshi pa un ecosistema di IoT fuerte y innovador na Aruba cu ta crea oportunidad pa desaroya solucionnan di IoT cu ta agrega balor, mehora procesonan operacional y contribui na e futuro digital di Aruba.
