SETAR ta orguyoso di por a presenta un projecto ‘Tribute to 70 Years of Carnaval’ na unda a brinda homenaho na 25 cancion di carnaval cu a influencia henter e cultura durante tur e añanan aki. E fiesta a tuma lugar diabierna anochi na Renaissance Convention Center.
Roland Croes, director di SETAR ta bisa cu e ta spera cu tur hende a gust’e, nan por a wak e si con tur hende a disfruta. E tabata un idea di un empleado di SETAR y nan a kies pa ehecuta esaki y haci’e di e forma aki. E idea tabata mas tras di e motivacion pa lanta Aruba su musica di carnaval tambe riba un nivel halto unda por presenta cancionnan clasico cu un orkesta completo, den un evento di gala. Carlos Bislip tabata esun cu a lidera esaki. “Tin cancion prome cu mi tempo tambe, mi a gusta e tema The Village is burning down, con el a cant’e, young quick silver ta tremendo.” Esaki ta un biaha so lo organisa y e evento di mas grandi cu SETAR lo organisa p’e aña ki.
Roy Lintz, conoci manera Cachete, un di e personahenan hopi conoci y un di e tatanan di musica di carnaval di Aruba. El a bin presencia e actividad aki y keda hopi contento, agradecido di por a tuma parti di e gran evento aki. “Ta un honor pa nos, y tambe di wak e generacion nobo, tremendo sua, mi ta asina contento.” Cachete a presenta un cancion di su amigo stima defunto Hildward Croes ‘Aruba dushi tera’ cu Cachete a composita, 25 aña pasa. Nan ta toca e cantica aki ainda aña aden y aña afo na diferente evento, y Cachete ta gradici Aruba pa haci e cantica aki asina grandi. Musico Sergio Barros ta bisa cu e evento tabata sigur tremendo y tur hende a disfruta y pasa bon. “Tur cantica di nan tempo te cu aworaki ta bon, e publico a biba cu tur cancion,” Sergio ta bisa.
Inky Richardson a subi ultimo riba stage tabata pa celebra carnaval 65, anto e tabata riba stage ayeranochi pa presenta algun di su temanan. “E ta hopi dushi, sigur cu e banda grandi, e ta un emocion y sensacion dificil como artista pa splica. Ora bo subi ey riba, si bo wak nos move ta paso el a drenta den nos, y nos ta pas’e over na hendenan presente,” Richardson ta bisa. Tur e canticanan cu a existi di añanan 70 te cu awor ainda tin nan impacto, reflehando con unico nos musica di carnaval ta na Aruba.
