Serlimar ta informa cu entrante prome di april 2023, lo tin un adaptacion den su tarifa pa e servicio di recoge y procesa e desperdicio residencial di tur siman.
Esaki ta pa cubri e gastonan operacional y di procesamento di desperdicio residencial. E lunanan di januari, februari y maart 2023 ta wordo ofreci na e tarifa actual. Ta consehabel pa haci pago online, poniendo e number di cliente y adres.
Serlimar S.G. ta haciendo esfuersonan pa haya e-mail y number di telefon di tur cliente cu ta ricibiendo servicio actualmente. Esaki ta pa por haya e factura mensual via e-mail y asina pueblo y Serlimar S.G. por aporta na medio ambiente, door di menos uzo di papel.
TARIFA NOBO
E adaptacion ta concerni unicamente e tarifa normal, pues pa Adulto Mayor y esunnan den bijstand lo no tin cambio.
– Pa esunnan cu tin servicio di un (1) container (240 liter), tarifa ta bira Afl. 32,00 pa luna.
– Pa esunnan cu tin servicio di dos (2) container (480 liter), tarifa ta bira Afl. 41,00 pa luna
– Pa esunnan cu tin servicio di tres (3) container (720 liter), tarifa ta Afl. 70,00 pa luna.
E Adultonan Mayor cu ta cobra solamente pensioen di SVb y ta forma un famia te cu 2 persona cu ta dependiente di e pensioen di SVb, ta keda paga e mesun tarifa actual di Afl. 10,00 pa luna. E tarifa aki ta pa e servicio di un (1) container.
Pa e personanan cu ta cobra onderstand: tarifa di Afl. 0,00 ta keda vigente. Esaki ta encera un (1) container.
FACTURA MENSUAL DURANTE AÑA 2023
Pa por ricibi e facturanan mensual digital, por manda nos un e-mail na: [email protected], cu nomber y fam, adres y number di telefon. Tambe por scan e QR code riba e factura unda cu lo bo por yena bo datonan personal y e-mail adres. Ta subraya cu riba cliente su factura di aña 2023, e luna di januari, februari y maart 2023 ta wordo ofreci na e tarifa actual, cual ta Afl. 28,00 pa un container y Afl. 38,00 pa dos container. E late fee di Afl. 5,- no ta aplicabel pa januari, februari y maart. E tarifa nobo ta wordo factura entrante e luna di april 2023.
TENE CUENTA CU LO SIGUIENTE:
Pa pagonan cu drenta despues di dia 14 di luna, cuminsando na april lo cobra Afl. 5.00 extra. Si dia 14 di luna ta cay den weekend, manera luna di mei y oktober, e ultimo dia di pago lo bira 15 di mei y 16 di october, 2023.
Serlimar ta haci su maximo esfuerso pa mantene e cambio den tarifa na un minimo. Nos ta gradici y balora bo confiansa den nos servicio. Por bishita nos Facebook page pa keda al tanto di informacion nan importante.
