Tur hende a yega di wordo atendi den un of otro forma pa un enfermero of enfermera y nos por kere cu e tarea di un enfermera of enfermero ta di solamente pone un remedi, coy un pulso, busca un ader y un cantidad di cos mas.
Berdad, nan dia di trabao por ta consisti di esaki pero e ta mucho mas cos. Ta di duna animo na pacientnan, famia, duna confianza, etc.. Esaki solamente ta posibel na e vocacion cu e profesionalnan aki ta sinti pa nan trabao.
Pero henter e sistema di Salud ariba su mes ta depende di varios aspecto.
E prome aspecto ta e hecho cu nos ta depende di e servicio di nos aseguro general AZV, bao cual nos Salubridad Publico ta hinca. Y akinan no ta falta e cantidad grandi di criticanan y hopi conoci riba e tardanza pa reaccion y atendencia di dokter of specialistanan, e sistema cu nos hendenan ta wordo atendi cual mayoria biaha ta wordo gestempel di ta uno no adecua, etc..
Un otro aspecto ta e asunto di cuanto e sistema aki ta costa nos comunidad, mas ainda esnan cu ta paga e prima esta e dunador di trabao y e trahador !. Pues loke ta costa e trahador pa asina e servicio aki ta posibel na tur nos ciudadanonan, ta un peso enorme pa e cartera di e trahador.
Y e otro aspecto ta e realidad mahos cu esnan cu ta labora den e mundo di enfermeria, no ta esnan miho paga, tin cu lucha constant pa atencion y hasta pa tin material adecua pa por funciona. Un asunto hopi importante ta con nan final di carrera ta regla, esta ora nan bai p.e. cu penshun!! Un aspecto hopi importante pa tur trahador na Aruba.
Nos por corda con un par di aña atras a inicia cu un arreglo di penshun general, y lastimente esaki a keda te eynan tambe. Mas tristo ta tambe cu e mayoria di esnan den enfermeria ta e arreglo di penshun aki so nan tin como beneficio. Awor ta e mesun grupo di trahadornan aki ta depende tambe di nos sistema di salud pa por mira posibel adelanto of mehoracion den nan condicionnan di trabao.
Hopi biaha e prome pregunta cu ta bin laira ta, con hasi esaki si no tin fondo suficiente??? Pues cada biaha e punto di fondo ta bin na laira y asina nunca e tema di percura pa un bon arreglo di penshun pa esnan den enfermeria no ta haya prioridad. Y ora nos ta papia di un bon arreglo di penshun, nos no ta papiando di un Seguro, nos no ta papia mas di un procentahe minimo of abao manera e ta na e momentonan aki.
Nos ta papia di un arreglo bao di cual mañan e trahador por bai cas descansa trankilamente, bai cas sin niun preocupacion cu si e lo tin un entrada digno pa por sobrebibi !!.
Pesey mes tur ideanan pa pasa p.e. SABA bao di AZV, na unda ta abase di lucha di SEPPA hunto cu e trahadornan aki a yega na e beneficionan cu awe nan ta goza did je, ta ideanan hopi peligroso y trahadornan mester ta hopi alerta pa no perde.
Trahadornan di SABA ta e unico fundacion social subsidia pa gobierno cu ta cay bao di e arreglo di APFA. Esaki tabata un lucha largo !!
SEPPA ta sigi kere cu ta importante pa inverti den e profesion di enfermeria cu ta esencial pa e crecemento economico y e logro di atencion universal na salud. Nos ta papiando di trahadornan cu na ora di trata un pacient tin acceso na un imagen completo y hunto cu un curriculum di educacion exigente ta comberti e trahadornan den un posicion unico y di liderazgo ora di trata asunto di salud di un pais.
Pesey ta momento pa trata e posicion di tur esnan den Enfermeria y duna e Balor mereci. Tin hopi cos pa mehora y den tur e trayecto mester scucha e voz di esnan cu ta labora den e mundo aki.
Na ocasion di e conmemoracion di e Dia importante aki pa esnan den Enfermeria nos ta felicita tur trahador den e ramo, principalmente e miembronan di SEPPA.
No ta tur ora ta mira e importancia y balor di e trabao cu ta keda desplega ta haya balor, sin duda algun boso merece hopi mas.
