Sindicato SEPPA a reuni cu trahadonan di Arubus despues di a sinta cu minister di Transporte, Ursell Arends. Tur trahado a haya informacion di loke por a saca afo den encuentro cu e mandatario riba 16 di october. Un di e peticionnan di minister tabata pa dun’e dos siman pa por bin sinta bek na mesa.
Te ainda no a haya resultado di e rapport for di e compania Advance cu lo mester a analisa e dos proposicionnan cu tin riba mesa pa loke ta structura salarial, y bini cu un posibel solucion of proposicion pa trece partidonan mas cerca di otro.
LO TIN PROBLEMA TUR LUNA
E resulltado aki Arubus of minister a hay’e caba segun comprension di SEPPA, sinembargo, SEPPA mes no a haya e rapport aki ainda. Magaly Brito, secretario general di SEPPA ta subraya tambe cu e di dos preocupacion cu a bin dilanti ta cu den presupuesto di Pais Aruba a aloca 10.6 miyon pa Arubus, y te na mommento di e discusion, manera nos a informa anteriormente tambe tabata apenas 5 miyon Arubus a ricibi.
“Nos ta pensa cu ohala den e reunion aki gobierno por a recapasita y manda mas placa pa Arubus, cual ta sumamente necesario,” segun Brito.
A bin dilanti caba cu Arubus a bin ta cubri tur nan gastonan y esey a cuminsa pone presion riba nan likides pa por paga hasta salario. Y si e tema aki no haya un solucion, ta tur luna lo tin un problema. Hecho ta si cu Arubus mes a indica cu nan a bay basta dilanti den entrada, pero esey no ta suficiente.
Hunto cu esaki na unda tin ainda discusion na mesa e parti di structura salarial pa trahadonan di Arubus, ta haci cu trahadonan ta mira cu aworakinan bayendo pa cuater siman caba despues di e reunion unda a pidi dos siman, ainda no tin solucion.
Apenas a caba di haya un peticion pa un reunion otro siman pero pa e trahadonan esaki no ta suficiente – nan ta mira cu esaki ta un otro wega pa laga dia pasa sin bin cu acuerdo.
Lesa mas den TREMPAN.
