Actualmente tin un proposicion di ley na Parlamento pa legalisa matrimonio entre personanan di mesun sexo. Raad van Advies a duna su conseho positivo caba riba e proposicion di ley aki y Hof tambe a obliga gobierno introduci un ley di tal indole. Gobierno di Aruba no tabata di acuerdo cu e decision di Hof y diabierna 10 di november e huesnan di casacion lo cuminsa trata e caso na Hulanda.
Nos por a scucha nos Prome Minister defende derechonan di e comunidad LGBT+ den un conferencia na Den Haag tocante progreso di femenismo. E lidernan religioso tambe ta para pa derecho igual den e casonan igual. Sinembargo, tanto gobierno como parlamento mester realisa cu ora ta trata di matrimonio di e personanan di mesun sexo Corte Europeo pa Derecho humano ya a dicta cu aki no ta trata di e casonan igual. Consecuentemente no tin derecho legal pa habri matrimonio pa personanan di mesun sexo na Aruba.
Gobierno y parlamento mester puntra nan mes dicon e luchadonan pro LGBT+ a bini cu un proposicion di ley pa acomoda lesbiana y gay (LG) pero nada pa bisexualnan (B). Si e lucha berdaderamente tabata pa igualdad ta exclui bisexualnan for di e proposicion di ley aki. Esaki no ta prueba cu e meta real no ta igualdad sino simplemente desmantela matrimonio conforme ley di Dios y ley di naturalesa?
Legalisa matrimonio entre personanan di mesun ta habri un caha di pandora pa legalisa tur otro tipo di preferencia sexual den futuro. E pedofielnan na Hulanda y Merca ya a cuminsa uza e mesun strategia cu homosexualnan tambe ta uza, esta nos a nace asina.
E consecuencianan di legalisa matrimonio di mesun ta mucho mas cu simplemente duna dos persona cu ta stima otro cierto derecho. E ta encera tambe cu gobierno ta declara cu e acto homsexual ta normal y cu esaki mester ta inclui den enseñansa na nos muchanan. Pa no papia mes di e riesgonan pa salud ora hende uza e partinan di e curpa humano contrario na su diseño y funcion.
Ya caba tin un aumento di problema di salud bou di hende muhe den un relacion heterosexual den cual ta uza practicanan di e bida homosexual. Esaki ta djis algun di e consecuencianan si Parlamento declara cu e acto homosexual ta normal.
Gobierno no mester sucumbi pa presion di Hulanda cu hasta a cambia su constitucion pa acomoda e hendenan LGBT+. Lidernan religioso ta haci un apelacion na Gobierno pa duna pueblo di Aruba e oportunidad pa expresa su mes riba e topico aki pa medio di un referendum. Asina so por garantisa cu democracia ta funciona berdaderamente relaciona cu e topico aki.
