Den e ultimo luna(nan), pa no bisa aña, e trahadornan SABA ta bibando den un tension enorme. Pa prome nos no mester lubida cu trahadornan di SABA tambe a pasa den e parti di corta den nan salario. Esaki hunto cu presion di trabao y menos entrada, tur a haci un efecto. Hunto cu esaki pa hopi aña caba algun trahado ta wardando riba un placa cu a keda debe nan, pa falta di paga e salario manera mester ta. E reclamo aki ta yama ‘rechttrekking’ y ta awo tambe parti di e discusion entre Gobierno y SABA, ta loke sindicato SEPPA a publica den nan comunicado.
Minister Arends a dicidi di laga haci un ‘stukken onderzoek’
Despues di e reclamo di SEPPA, Minister Arends a informa cu gobierno ta bay laga haci un investigacion pa saca afo si gobierno a paga e placa aki di ‘rechttrekking’ si of no (manera cu ya bisa) of ta SABA a haya e placa aki y no a paga e trahadornan, of kico a pasa.
SABA tambe ta bisa cu nan no a haya e placa!. T’asina cu gobierno su enfoke ta pa un control di placa cu lo a duna na SABA riba e añanan 2017 pa 2021 y kier a sa si enberdad a uza esakinan p’e meta pa cual nan tabata destina. Tur esaki tin di haber cu e inpassing di e structura salarial di e personal den cuido niveau 3, ehecucion di e VU regeling (pa essunnan cu tabata den servicio te cu prome di januari 2011 y no tin areglo di pensioen), tambe a bin aden cuestionamento di e placa di zak- y kleedgeld di of pa nos grandinan.
Pero ta wak cu tambe kier analisis di e gasto di construccion di un pida n’e localidad di San Pedro di Verona. Pues, bo ta mira claramente cu awo e reclamo di e trahadonan a cay den full un investigacion y ta p’esey ta bisa cu e reclamo ta memey di e bay bin di SABA y Gobierno. Aunke tin mas punto cu gobierno lo a pidi claridad y esakinan tur ta bin acerca.
T’e resultado di e investigacion aki ta interesante, ya cu ta akinan e trahado ta haya claridad kende ta papiando e berdad. P’asina nos tur sa kico a pasa, ken debe ken y con ta bay paga. Mientras cu enfoke ta riba e Kortgeding di SABA contra Gobierno, si SABA a perde of Gobierno a gana of vice versa, e no por keda sin atende e tema di subsidio y e regla- of condicionnan p’esaki.
Tur dos banda mester cumpli! Awo si esaki no soluciona, e ta bisto cu ta nos Grandinan of e trahadonan lo ta perhudica.
Maneho di nos grandinan ta responsabilidad di un pais
E responsabilidad p’e maneho di nos grandinan ta di un pais. E no ta di ningun instancia su so, pues tampoco SABA. Menos si bo ta depende di placa di subsidio. Cu tur loke ta pasando, ta nos Grandinan y e trahadonan ta den riesgo di e desicionnan cu por cay. SEPPA no por permiti cu un tema asina delicado manera “Nos Grandinan” ta uza como medio pa haya rason.
SEPPA ta pidi tanto SABA como Gobierno pa reflexiona riba e situacion reinante. E problema andando por tin consecuencia pa nos tur, pa nos Grandinan, pa trahado y pa un comunidad. E lo mustra con poco balor nos tin pa nos hendenan y un pais deficiente cu no por garantisa nos grandinan un maneho adecua.
Sigur si SABA y Gobierno no yega na otro. SABA ta ricibi placa di subsidio (ta di pueblo) y Gobierno ta representa pueblo, ta responsabel p’e maneho di nos grandinan y por lo tanto por pidi claridad con e uzo di e placa di pueblo a bay.
E claridad of e transpariencia aki mester t’ey tur momento y sin excusa. SEPPA ta adverti tambe cu nan ta vigilante n’e direccion cu ambos partido kier tuma. E trahadonan ta cla eynan pa defende nos grandinan y nan cupo di trabao y ta spera tambe cu no ta creando wega pa bolbe rek y no paga trahado placa cu debe nan.
