Sindicato SEPPA, gerencia di SABA y Mediador di Gobierno a sinta na mesa pa yega na algo concreto riba preocupacion di trahadonan di e stichting. Tin masha hopi incertidumbre cu si ta paga cierto primanan of y no y di con. A pidi SABA pa pone un fin na esaki y a logra yega na algun palabracion.
Magaly Brito, Secretario General di sindicato SEPPA tabata presente na e reunion aki na oficina di Mediador. Un reunion cu a tuma luga awe den oranan di merdia.
Tabatin demasiado informacion ta circula rond, protesta di trahadonan pa motibo tur cos ta indica cu e stichting no ta bay paga e Bashi-Premie. Despues a bini mas rumor cu kier paga e 7 dianan di ATV-Dagen pero no e Bashi-Premie. Tur esaki a cambio cu no ta bay wanta of kita 5%.
For di december caba SEPPA a pidi gerencia pa cumpli cu nan deber di duna tur informacion na tur trahado y laga nan dicidi riba e opcionnan cu tin riba mesa. Pero esey no a tuma luga. E consecuencia ta cu den e luna aki, momento cu ta yega fecha di e pago aki, e preocupacionnan a sigui.
E trahadonan ta preocupa pasobra tur loke nan ta tende ta cu tin un decision tuma caba riba e asunto aki. Brito a bisa cu e trahadonan a dicidi cu nan lo lucha pa nan Bashi-Premie y tur loke cu tin riba mesa. Y riba dje, ningun informacion oficial ta yega cerca e trahadonan.
A discuti tur e puntonan aki den reunion cu Mediador y, segun Brito, a logra yega na un entendimento. SABA lo cumpli cu su deber di duna informacion na tur trahado y lo presenta e opcionnan cu tin, basa riba loke ta haya di subsidio di gobierno.
Na final ta bay pone un fecha, otro siman diahuebs, unda cu tur trahado lo por bay dicidi cual ta opcion nan ta bay scoge y esey lo ehecuta.
