Diaranson despues di 5:00 pm, polis a bay un asistencia na un bar den e area di Mangel Halto. Segun por a compronde lo tabatin un hende muhe insultando e clientenan di e bar. Na yegada di e agentenan policial, nan a bin compronde for di e hende muhe, cu ora el a yega e bar, un persona masculino sinta pafo lo a falt’e respet door di a mishi cu su pecho.
Pero e hendenan sinta pafo a nenga cu esey a sosode. E señora a cuminsa lansa insulto, tira awa riba nan y te hasta saca dede pa nan. Algun cliente di e bar a papia cu ne p’asina purba calm’e. E polisnan a papia cu ne y puntr’e cua di e hombernan a mishi cu ne, sinembargo a no kier a apunta ningun di nan ni tampoco menciona nomber di esun cu a mishi cu ne.
Na sitio por a compronde e señora ta biba den cercania y ta bisiña di e bar. Polis a papia basta rato cu ne pero el a keda lansa palabra ofensivo. Despues di un rato ta papia cu ne, polis a conseh’e pa e bay su cas. El a opta pa haci esaki tambe.
