Diasabra atardi durante un seminario di mas cu 3 ora tocante powerlifting y tur otro aspecto di “barbell training”. Bintidos atleta di diferente ramo di deporte, a siña e aspect fundamentalnan di e deporte. Coach Jonathan Wever y coach/atleta Jason Li ambos a duna splicacion y varios demonstracion di tur cos cu tin di haber cu e deporte.
Den un ambiente ameno y cu hopi entusiasmo, por a mira un variedad grandi den e grupo cu a participa den e seminario, unda cu atleta di diferente deporte a participa, manera CrossFit, Weightlifting y Powerlifting mes. Ademas di esaki, ta interesante pa wak cu di e 22 atleta cu a participa, mitad di esaki tabata hender muhe, cu sigur ta mustra cu e deporte ta haya hopi atencion di ambos genero.
E desaroyo den e ultimo añanan, ta mustra cu e interes general den e mundo di “health&fitness” a crece hopi, y e stigma di cu hende muhe no mester lanta peso ta elimina. Recien por a mira cu Paradise Strength Aruba (PSA) mes a logra organisa dos evento di Powerlifting, cu hopi acogida, di mas cu 30 atleta a participa cada bes, ademas di a mira un tremendo evento di Strongman (Aruba’s Strongest Man) cu a organisa door di Mariniers Kazerne conhuntamente cu PSA y BodyFitnessGym&Nutrition.
E deporte di powerlifiting ta un deporte di forsa maximo, unda cu ta competi den 3 disciplina, squat, bench y deadlift, unda na final ta conta tur 3 paso hunto pa yega un total final. Unabes tin e total, a base di genero, categoria di peso y edad, ta traha riba e rankings final. Den e caso di Aruba, e federacion di “Aruba Bodybuilding & Powerlifting Federation” (ABPA) ta carga e deporta aki, cu afiliacion internacional na e federacion “International Powerlifting Federation” (IPF), cu ta e federacion mas grandi, a base di totalidad di miembronan internacional. Apesar di no ta un deporte olimpico, e ta reconoci door di “International Olympic Committee” (IOC) y ta forma parti di e “World Games” cu ta tuma luga cada cuater aña.
Ta gradici tur esnan cu a participa y/of a mustra interes den e seminario, y ta den preparacion pa asina sigui organisa eventonan asina ki, pa sigi desaroya y eleva e deportenan di forsa na Aruba.
