Awe diadomingo ta marca comienso di Semana Santa, conoci como Diadomingo di Rama. Di experiencia di misanan na Pos Chikito como na Savaneta, tur cos a bay bon, segun pastoor y vicario di Aruba, Andres Makowiec. Naturalmente no por haci procesion manera custumber, pero esey no tabata den plan. Sin procesion, cu celebracion hopi mas simpel.
A opta tambe pa no prepara rama pa hende, sino mas tanto pa nan mes bin cu nan rama. Si a prepara algun rama por sea caso. Tabata algo masha bunita, pasobra a bin cu diferente idea ora cu nan bin cu nan rama.
Na Savaneta por ehempel tabatin un corista cu a anima. E participacion tabata hopi bon y esaki ta un bon inicio pa Semana Santa.
Obispado di Willemstad y Gobierno di Aruba a tene un combersacion y, segun e vicario, tabatin un tipo di reaccion basta fuerte. Tumando na cuenta tambe cu e situacion di Aruba tabata hopi pio algun tempo atras. Awor aki cu ta Semana Santa, cu ta asina importante pa e practica religioso pa por expresa y practica di un forma directo den misa. Pesey tambe tanto clero como pueblo pacivamente via medio, a expresa nan pensamento.
Si a logra pa keda cu misanan habri. Pero den e mesun rosea e vicario a apela, tanto pa coleganan sacerdote, tur esunnan di parokia y pueblo di Aruba, pa haci esaki cu hopi responsabilidad y prudencia, pasobra sa cu situacion ta preocupante.
Ta algo bunita cu si por reuni den misa y tambe a agrega cu tur parokia fuera di esunnan cu por participa den misa, ta transmiti via pagina di Facebook di cada parokia of a traves di otro medionan, pa esunnan cu no por yega, por sigui transmision di e misanan nan caminda di cruz of nobenanan of cualkier otro celebracion cu por tin.
Probecha e siman aki, cu ta recorda sacrificio y morto di Hesus, pero vooral su resureccion, pa pidi Dios, cu pa motibo di pandemia, por participa den e resureccion. Ta pidi Dios pa esunnan cu a bay nos dilanti pa motibo di pandemia, pa Dios duna nan sosiego eterno. Tambe tur esunnan afecta y den cuarentena, keda uni den oracion y Dios sigui drama riba nos su bendicion pa no cana e caminda aki solitario y ta consciente cu Dios ta cu nos.
KICO TA DIADOMINGO DI RAMA?
Nos tur conoce Pasco Grandi, conoci na Ingles como “Easter Sunday”, pero poco sa e berdadero nificacion di e Diadomingo di Rama of na Ingles yama “Palm Sunday”. Prome cu resureccion, Catoliconan ta corda e hecho cu a crusifica Hesus, despues el a muri y a der’e.
Diadomingo di Rama ta marca e momento den historia ora e yiu di Dios a drenta Jerusalem, mara patras di un burico, cu un multitud grandi di publico na banda. E mesun hendenan aki despues a pidi pa nan mat’e.
E nomber mes ta bini di e blachinan di mata, e palmeranan, cu pubico a benta riba caminda pa Hesus cana riba dje mara tras di e burico, drentando Jerusalem. Awendia ta uza e mesun mata aki pa simbolisa paz y victoria. Den bijbel na mas di un ocasion a uza e palmeranan aki como homenahe na un heroe conkistado. Ora el a yega publico a uza e palmeranan aki y hasta a pone paña na su pia pa homenag’e.
PROSECION
Awendia ta uza e mesun rama aki pa parti cu debotonan, cu ta carga nan den un prosecion drentando misa. Ta bendiciona e ramanan cu awa bendita. Ta traha cruz chikito cu nan, pa hiba cas. Despues ta kima nan e siguiente aña pa crea e as cu ta hunta na frenta di Catoliconan riba “As Woensdag” net despues di Carnaval, pa simbolisa inicio di e temporada di cuaresma. Na e partinan di mundo unda e matanan aki no ta crece, ta uza flow of blachi di olijf.