Aruba su seleccion U12 di baseball ta den pleno preparacion pa un torneo grandi na Mexico. Dentro di algun dia nos muchanan lo ta biahando pa e torneo Panamericano Pre-Mundial di baseball unda dia 25 di augustus proximo Aruba lo hunga nan prome wega contra di Venezuela. Aruba ta den poule B hunto Mexico, Republica Dominicana, Nicaragua, Argentina y Venezuela.
Un total di 4 ekipo lo representa e continente America den e Mundial di Baseball U12 cu lo tuma lugar na Puerto Rico. Aruba su seleccion ta consisti di e 17 hungadornan cu ta Yandel Gill, Clayton den Boef, Jomar Ortiz, Jeden Leon, Joenelly Vd Linden, Narvin Meyer, Jedion Farro, Clarence Noguera, Jayron Kelly, Riangelo Richardson, Rayshaun Werleman, Juan Ramada, Dijeandrick Wernet, Antoine Piña, Michel Corniel, Jaden Kock y Shaqion vd Biezen. E seleccion lo ta bou encargo di manager Ludwin Dabian ayuda pa coachnan Jason Orman, Richard Simon y Greg Croes. Un palabra di exito na nos seleccion di baseball U12.
Aruba su baseball sin duda ta destacando den gran forma mirando cu algun siman atras nos muchanan di baseball Junior League a logra titula campeon Latino Americano di baseball mientras nan a haya e oportunidad di representa e continente Latino America den e Serie Mundial di Baseball Junior League na Taylor, Michigan. Sin duda e comunidad completo a biba cu e bunita momento aki.
Stichting Sportsubsidie Aruba a yuda subsidia e biahe di e seleccion di baseball U12 pa e Campeonato Panamericano U-12 Pre-Mundial na Aguascalientes, Mexico.
Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
