Otmar Oduber, cu a haci su re-entrada di politica luna pasa, a mustra su apoyo na e proyecto hotelero Secrets of Baby Beach. Tabata hustamente Oduber kende cuatro aña pasa a anuncia e proyecto aki durante un celebracion den caya grandi na San Nicolas. Awe ainda e hotel no ta cla debi na procesonan andando den Corte. Proceso cu e politico no por compronde e motibo tras di esaki. Mas pasobra e lo percura pa un desaroyo grandi y hopi entrada pa pais Aruba.
E no t’ey pa defende interes di Secrets pero si di Aruba y San Nicolas specificamente, el a bisa.
El a papia di historia di turismo na Aruba y incluyendo tur intento den pasado pa bini cu hotel pero nunca a logra. E hotel no ta riba beach, pero riba klip. Pero cu for di 40 aña a wordo apunta como un area turistico.
A hancra esaki den ley di RPO, cu e ta destina pa hotel. Despues a bini ROPV cu e mes a laga atras, y eyden ta crea oportunidad pa e hotel aki bini. A yega di negocia cu Grupo Piñero, pero e tempo ey e Gobierno di AVP a cambia di direccion y a keda concentra riba refineria. P’esey nan dicidi di bandona e proyecto.
El a splica cu bou Gabinete Wever-Croes el a bolbe cuminsa cu e intento pa trece un hotel pa area di San Nicolas. Un grupo cu a haya tur e permisonan necesario pero e structura cu por trece un cambia a keda paralisa. No ta haya atencion necesario di Gobierno y otro instancianan pa para pa e proyecto y no manera di tempo di Beta y Plantation Bay cu a keda pa hopi tempo como un ruina.
E hotel di Secrets no tabata un promesa politico, Oduber a enfatisa, pero algo pa yuda e districto aki haya bida. El a bay compaña pa e estudionan necesario y cambionan cu mester a cana simultaneamente cu otro pa crea un ambiente turistico.
Estudionan ta mustra cu e hotel lo tin un impacto directo y indirecto di 1.5 biyon florin den un periodo di 10 pa 12 aña. “Esaki no ta un politico ta bisa, pero estudionan haci door di companianan di renombre.” Ta bisa cu 221 miyon dollar lo drenta caha di gobierno den un periodo di 10 pa 12 aña.
E ta lamenta cu e no ta tende oposicion ta comenta tampoco of defende e proyecto pa hunto para pa e hotel pa San Nicolas.
