Nan a yam’e e parada di S.U.N, Scolnan Uni Di Noord, y e tabata consisti di Agnles Kleuterschool, Colegio Felipe B. Tromp, Scol Preparatorio Cayena, St. Aloysius School, St. Anna School y Scol Preparatorio Aurora. Esakit tabata un parada escolar cu a tuma luga diabierna mainta saliendo for di Compleho Frans Figaroa, bayendo direccion Montaña, pasando ful rond patras bay caba na cura di Misa di Noord.
E aña aki no tin tur e scolnan di Noord cu a participa pa medio cu e cosnan a bay un tiki bruha na comienso pero nan tabata tin e scolnan basico y preparatorio cu a participa, segun Selwyn Rosenstand, cabesante di Colegio Felipe B. Tromp. E cabesante ta conta nos cu despues cu mas di 20 aña nan ta haya e oportunidad atrobe pa bay riba caya cu e muchanan.
Nan a ripara cu e muchanan ta gusta esaki hopi. “E ta un parti esencial di Carnaval nos ta kere y nos kier cuminsa siña nan for di chikito pa gosa sanamente di Carnaval.”
Dionne Lopez-Tromp, cabesante suplente di Agnes Kleuterschool, a bisa nos cu esaki ta bon p’e muchanan pasobra bo ta hinca e muchanan den e cultura for di chikita. “E cultura di Aruba cu ta Carnaval, e fiesta di mas grandi na Aruba.” E cabesante ta conseha pueblo di Aruba pa gosa di nos Carnaval pero cuida nos chikitonan. “Tin e momentonan cu ta pa nan, tin momentonan cu no ta pa nan, cuida nan bon y cuida nan oido bon.”
