Recientemente Scol Caiquetio a ricibi bishita di Stichting Fonds Kind en Handicap di Hulanda, esta un fundacion cu ta enfoca riba ayudo p’e muchanan cu tin cualkier handicap of enfermedad cronico cu por ehempel transporte adecua, caminda di hunga special, terapia particular of herment pa apoyo y siñamento. Asina Carolina Paesch-Quandus, cabesante di Scol Caiquetio, a splica cu no ta prome biaha cu Vanessa Veenman-Vissers ta bishita e scol den nomber dje fundacion.
Stichting Fonds Kind en Handicap ta yuda Scol Caiquetio cu varios proyecto grandi cu e scol mes no tin recurso pa cubri riba su mes. E biaha aki, e fundacion a haci un donacion di material pa un ‘snoezelruimte’, esta locual nos ta yama aki un skina dushi. Esaki ta un espacio hopi importante pa tin den un scol en general pero particularmente pa mucha special, ya cu nan tin un poco mas necesidad pa tin un espacio caminda nan por bay pa calma. Tambe e scol a logra adkiri algun programa digital cu por yuda e muchanan special desaroya nan mes den forma intelectual.
Di su banda Vanessa Veenman-Vissers di Stichting Fonds Kind en Handicap a splica cu ya ta pa algun aña caba cu nan ta brinda sosten na Scol Caiquetio cu un variedad di proyecto. Esaki debi cu e scol no ta haya ningun subsidio ni tampoco e materialnan cu e muchanan special aki tin mester pa sigui desaroya. E fundacion ta contento di por a aporta na Scol Caiquetio un biaha mas.
