Stichting Algemene Bejaardenzorg Aruba a dicidi bay corte algun siman atras contra pais Aruba pa motibo no por caba di sali di e impase riba si Gobierno ta responsabel pa un suma di placa cu te ainda no a haya. Manera e dicho tal bisa, el tiro salió por la culuta. Nan a perde e caso. Tabata e propio Minister encarga cu Asunto di Grandinan, Ursell Arends, cu a haci e anuncio aki den e noticiero Enfoke.
E tratamento a tuma luga dia 21 di april ultimo unda cu SABA a presenta cu su director Remo Kock y tambe por a nota presencia di Minister Ursell Arends cu e funcionario di su ministerio A. Dirksz.
E escencia di e caso ta cu SABA a pidi corte pa ordena Gobierno pa den tres dia di tempo, despues di e sentencia, pa pone un paro mesora na e reduccion di 7.6% cu nan tin riba e subsidio di SABA. O sea pa bay bek na e 100% di subsidio, manera cu esaki tabata prome cu e pandemia.
Tambe a pidi pa banda di e suma di subsidio cu ta duna SABA, tuma pa cuenta di Gobierno tur gastonan cu tin di haber cu e actual inflacion pa loke ta alimento, pa luna di februari 2023 tabata 11.6%, tambe e aumento di gastonan di utilidad pa awa, coriente, gas y diesel cu tabata 16%.
Banda di esaki a pidi pa Corte ordena Gobierno pa den tres dia di tempo, despues di e veredicto, pa ausencia di un Landsbesluit 2023, otorga na SABA, por escrito y ireversibel, un subsidio garantisa pa e periodo di juli – december 2023 cu ta basa riba un subsidio fiho pa aña di 23.826.938 (paga mensualmente).
Of pa ordena Gobierno pa pone un suma di subsidio husto pa 2023, incluyendo e gastonan anual manera reparatiepremie, najaarspremie, vakantiegeld, un suma di reserva pa mantencion chikito / averahe y material di cuido, pero no limita na ekipo pa lanta pashentnan, cama y ekipo pa baña nan.
Gobierno a pidi pa rechasa e peticion aki
E subsidio cu Gobierno awo ta duna SABA ta regla den ley. Dia 25 di februari ultimo, SABA a pidi un subsidio pa aña 2023. Gobierno no a reacciona riba e peticion aki. Corte ta papia di un rechaso “ficticio” di e peticion aki. Tin un procedura cu SABA mester a cana pa bay contra e falta di contesta aki. SABA, segun el a splica, no a haci uzo di e opcion aki na tempo pa cual e rechaso ficticio di nan peticion a bira un decision legal.
Esaki combina cu e echo cu e peticion di SABA tur tin di haber cu otorgamento di mas subsidio (adicional) pa e periodo di juli te cu december 2023, ta haci cu nan demanda ta inadmisibel den un caso civil. Por lo menos no den un caso civil.
E situacion cu SABA, sea no di un forma legal, a haya adelanto riba nan subsidio no ta haci e situacion diferente. SABA tin chens pa haci un apelacion na Gobierno atrobe, teniendo cuenta cu articulo 6 di Ley di Subsidio, pa e subsidio. E ora cu Gobierno, segun LAR, lo mester tuma un decision den cierto termino.
Pues e demanda di SABA ta inadmisibel den e corte aki.
