Stichting Avondonderwijs Aruba (SAA) ta masha contento cu nan a logra haya un chens pa sinta cu formado y duna un splicacion riba e diferente puntonan cu ta importante aworaki. Juffrouw Ginny Croes a conta cu e reunion a bay den un forma ameno y a yama danki na e formado pa e atencion.
Segun Croes, e stichting tin hopi tempo sin sinta cu minister di enseñanza, esaki debi na, entre otro, e pandemia. Pero finalmente a logra sinta cu formado y a logra dialoga riba e tema di ‘losse uren beleid’ riba cual no a logra haya un contesta por escrito riba dje ainda. Tambe a bolbe trece dilanti e ‘meer jaren plan’ pa asina por haya clarificacion riba kico mester cambia pa haya aprobacion.
Nathalie Wever, director di Avond HAVO Aruba a splica cu ta di suma importancia pa haya aprobacion pa e plan aki, ya cu akiden nan ta elabora riba e digitalisacion di Avond HAVO. Specialmente pa haci enseñanza mas accesibel ya c’un gran parti di e alumnonan ta consisti di persona cu tin trabou. Cu e digitalisacion nan por atende les den un manera mas conveniente.
E vision di e stichting ta pa yuda tur e adultonan cu kier sigui avond onderwijs termina esaki den un forma exitoso.
