Parlamentario di fraccion di AVP, mr. dr. Ryçond Santos do Nascimento a mustra cu mientras cu Prome Minister mes a confirma na cantidad di ocasion cu tin un investigacion tumando luga pa cu Arubahuis y ex-Minister Plenipotenciario Guillfred Besaril, e mesun Prome Minister ta stabiel cu Besaril.
“Pakico, ningun hende por splica pero den e ultimo dianan por mira señora Evelyn defende Besaril na sede di MEP, na Cocolishi y otro pero ningun hende por splica motibo di e apoyo aki.” Parlamentario Santos do Nascimento a sigui declara cu e Minister responsabel pa e Minister Plenipotenciario na Hulanda, ta Minister Presidente Evelyn Wever-Croes mientras cu su persona tambe ta responsabel pa trahadonan di Arubahuis na Den Haag.
“Esey ta e realidad y tur hende por consulta e LIM, cu ta e ‘Landsverordening Instelling Ministeries’ di e aña aki, caminda por tuma nota cual Minister ta responsabel y ta importante pa compronde kico e responsabilidad aki ta. Kico ta tarea di parlamento y kico ta e instrumentonan di parlamento pa por responsabilisa un minister, caminda parlamento tin e tarea di controla maneho y percura pa e maneho cu ta ser hiba ta uno cu ta hiba nos pais dilanti,” Parlamentario do Nascimento a trece dilanti.
El a sigui mustra cu pa garantisa un proceso democratico, Constitucion ta duna un parlamentario e derecho y e herment di haci pregunta y motibo di esaki ta pa Parlamento haya informacion.
“Esaki ta nifica cu na mes momento un Minister cu ta haya un pregunta di un parlamentario, tin obligacion di contesta e preguntanan aki, e tin e obligacion pa duna informacion ya cu ta asina nos Constitucion ta traha, asina e sistema parlamentario ta traha.
Anto ora cu unabes un parlamentario tin informacion of e Minister ta nenga di duna informacion, e ora parlamento por hiba un debate publico y pa tal motibo parlamentarionan tin como herment e derecho di pidi un reunion publico y Presidente di Parlamento tin e deber di yama e reunion publico aki ora cu tres of mas parlamentario ta solicita pa un reunion publico.
Esaki pa motibo cu na final di dia, nos mester por delibera tocante funcionamento di e Minister, den e caso aki Minister Evelyn Wever-Croes, e manera con e ta trata cu e parlamentarionan, e manera con e ta informa parlamentarionan.
Aki no mester lubida cu e parlamentario ta trahando pa Pueblo pasobra Parlamento ta cas di Pueblo, Parlamento ta representa Pueblo di Aruba. Si e minister ta nenga di duna contesta na Parlamento, e ta nenga di duna informacion na Pueblo. Esey ta e realidad y e herment di mas grandi y mas grave cu tin, pa responsabilisa un Minister, ta e mocion di desconfiansa cu por bin dilanti durante di un reunion publico.
Pa e motibonan aki tambe ta importante pa tur hende compronde kende ta responsabel den cada caso. Den e caso di Arubahuis mester ta consciente cu ta Minister Presidente Evelyn Wever-Croes ta e minister responsabel. Su persona ta esun cu tin autoridad pa duna instruccion na minister plenipotenciario, e ta esun cu tin e responsabilidad di percura pa Arubahuis ta funciona na un manera bon.
E parlamentarionan ta pidi reunion publico anto e contesta cu nos ta haya, ta nada! Nos no ta haya informacion bou di varios pretexto, nos no ta haya reunion publico bou di varios pretexto y consecuentemente señora Evelyn ta mina e democracia na Aruba,” parlamentario Ryçond Santos do Nascimento a declara den conferencia di prensa.
