Historia di Evelyn ta mustra un politico cu ta sigui e mesun trayectoria cu nos ta mira den pasado di MEP y un ‘sin fin’ di e partidonan chikito: oportunismo. Un politico cu no tin ningun idea con e por yuda Aruba progresa, ta uza e topiconan cu na e momento ta mustra oportuno, manera abuso di mucha. Como cu ni Evelyn ni MEP tabatin idea propio pa cu e problemanan social na Aruba, a practicamente entrega maneho social den man di Glenda Hernandez. Otro ehempel ta e topico di integridad cu a bira popular cu e investigacion riba ex-minister Paul Croes. Esaki a impulsa e retorica di Evelyn y su apoyo na Armand Hessels cu entre otro a haya miles di florin pa supuestamente promove integridad. Awe, Armand ta cuchicuchi cu Evelyn y e no ta cuestiona e falta di integridad di e gabinete actual. Como cu Evelyn ni MEP tabatin idea propio riba integridad a busca entre otro Arie Swaen pa encabesa Commissie Corporate Governance pa tira santo den wowo di Pueblo. Mientras cu a mercadea integridad, Evelyn hunto cu su partido y simpatisante a uza mentira pa purba despista pueblo di violacionnan di integridad y mal maneho financiero. A uza mercadeo pa bende un Bureau Integriteit Aruba cu obviamente ta incapaz pa para e fechorianan manera e nepotismo miyonario cu ta enrikece bufete di Evelyn su tata, cu ta enrikece sua, primo, acto-primo etc. Esaki ta yama netwerkcorruptie. Tanto MEP y RAIZ ta papia di integridad pero no ta para e conflicto di interes di Endy Croes cu na mes momento cu e ta contrapartido di Fundacion Lotto pa Deporte den un caso miyonario ta bira Minister di Deporte cu ta responsabel pa Fundacion Lotto pa Deporte.
Riba area financiero-economico no ta diferente. A hiba un campaña riba “Mega Debe” sin tin ningun vision propio con pa mehora e economia di pais Aruba. Ora realidad a gara Evelyn di sorpresa, e no por a haci nada otro cu sigui e solucion facil: medida, medida y mas medida pa saca placa for di cartera di pueblo, manera e 12.5% recorte riba salario di ambtenaar y sector semi-publico, aumento di prijs di awa y coriente, eigen bijdrage den cuido, introduccion di LNT y BTW. Hasta CAft y Hulanda a cuminsa cansa di e falta di vision aki, mientras gastonan di gobierno ta sigui subi y subi cu miyones…
Historia di Mike ta completamente diferente, pasobra Mike a sigui un trayecto particular: un idealismo sincero. Mike a desaroya un conviccion profundo cu mester subraya e dignidad di cada ser humano. El a resumi e idea aki den e lema: felicidad den cada hogar. E ideal aki ta hiba na e conclusion cu dialogo mester ta base pa tur decision importante den nos pais. P’esey tabata mas cu logico cu Mike a promove dialogo social durante su gobernacion. E dialogo aki a permiti Gabinete Mike Eman pa por a tuma varios decision dificil pero necesario cu aprobacion y colaboracion di e gremionan comercial y sindical. E mesun vision aki a conduci na un esfuerzo grandi pa reconstrui y renoba nos pais na un manera cu ta enrikece cada ciudadano den cada bario na Aruba. Proyecto manera Linear Park, Green Corridor y Watty Vos Boulevard ta expresa claramente e idea cu infrastructura no ta solamente pa esun cu tin un auto: e ta pa eleva esun cu kier cana y core bicicleta tambe. Riba area economico e idealismo di Mike a conduci na un esfuerzo grandi pa aumenta poder di compra pa tur. Esey ta demonstra cu Mike ta worry cu e ciudadano. Mike si ta compronde cu ora un famia tin suficiente pa por come y bebe bon, pa paña y articulo di scol, e famia ey por haci compra y asina beneficia e tienda, e supermercado, e contratista, e accountant y henter comercio na Aruba. Ta bon pa tur cu ta critica Mike corda cu ta cada hogar ta impulsa nos economia y cu p’esey mester recorda Mike su esfuersonan: reduccion di BBO, introduccion di kindertoeslag y di reparatietoeslag, aumento di onderstand, indexering, aumento di bashi-premie y gelijk bedrag, reduccion di tarifa di awa, reduccion di tarifa di coriente, extra ouderenaftrek, gehandicapten toeslag, studieleningenaftrek y mucho mas. Awe bo por mira e diferencia entre Mike cu Evelyn. No tin duda: Mike a traha pa Pueblo y Evelyn ta traha pa Friends and Family.
