Pronto e ruman di criansa di Anne Frank, esta Eva Schloss, lo ta na Aruba pa conta e experencianan cu el a pasa banda di e famoso personahe aki.
Durante un conferencia di prensa Chaya Blasberg, di Chabad Aruba, a papia di e meta di sra. Schloss na Aruba. E ta ruman di criansa y amiga di infancia di Anne Frank. “E ta riba su mes un storia di triunfo y sobrevivencia.”
El a pasa su bida ta biaha rond mundo pa comparti su mensahe di diversidad y paz mundial. Nan ta trece Aruba pa inspira e comunidad, y plama su mensahe di siña di pasado, biba e presente y mira pa futuro.
E forsa di Schloss, segun sra. Blasberg, ta con el a sobrevivi tur problema y experencia, y a inspira otro hendenan pa haci di e mundo aki un miho luga di biba pa tur hende.
E charla cu nan ta organisa ta habri pa publico en general.
E ta un oportunidad unico pa scucha e storia di Anne Frank y Eva Schloss. E evento ta tuma luga dia prome di maart den ballroom di Hilton, cu prijsnan special pa studiante. Por cumpra e entradanan online tambe via annefrankaruba.com
Eva Schloss apesar di ta haya hopi invitacion for di diferente parti di mundo, el a scoge pa acepta e invitacion pa bini Aruba.
