E rotonde cerca di hospital actualmente ta den construccion pa cual el a keda basta tempo cera. Construccion di e rotonde aki ta forma parti di e proyecto PPP di Watty Vos Boulevard cual ta den ehecucion.
Considerando e diferente reaccionnan den medionan di comunicacion relaciona cu e duracion di e proyecto, Minister encarga cu Infrastructura Otmar Oduber a acerca Director di DOW Marlon Croes pa informa riba e trabounan cu ta andando.
Sr. Croes a splica cu a haci varios cambio den e infrastructura pa loke ta e kabelnan di utilidad, tuberianan di WEB y tambe facilidadnan cu den futuro lo mester di dje. A traha tur e formanan pa esaki, y awo falta pa pone asfalt.
Intencion ta pa prome cu e contratistanan baha cu nan ‘bouwvakantie’ nan lo purba pa asfalta e caminda den transcurso di e siman aki, pa asina habri e rotonde pa publico por uza.
Pa loke ta e tardansa/retraso cu e proyecto a conoce, sr. Croes a splica cu e ta relaciona cu complicacion cu e planta di asfalt. Sinembargo, esaki ya a wordo resolvi y por a tuma nota cu e proceso di asfalta e caminda ta andando.
Nos Ministerio lo keda na altura di diferente desaroyo regardando preocupacionnan den comunidad y lo percura pa facilita e informacion aki na esnan concerni.
