Aruba Tourism Authority recientemente a conoce un cambio na su oficina na Bogota, cu ta maneha henter e region di Latino America, Ronella Croes, Chief Executive Officer di Aruba Tourism Authority a duna di conoce cu a tuma despedida di Miriam Dabian kende tabata director di e oficina durante hopi aña. Miriam Dabian a traha pa Oficina di Turismo pa casi cuarenta aña y pa mas o menos 15 aña a fungi como director pa e oficina di turismo di Latino America. CEO di A.T.A., Ronella Croes, a comenta cu a probecha di e ocacion special aki pa topa cu diferente socio y asina pone Aruba riba mapa un bes mas.
Sanger hoben na cabes
Durante e despedida di Miriam Dabian, a cera conoci cu e director nobo, un hoben talentoso y un cara conoci pa e oficina di turismo. Croes a menciona cu A.T.A. tabatin wowo riba e director nobo como un posibel candidato. E ta un persona cu a studia na Bogota alabes a traha y biba pa hopi aña na Latino America. Ta trata aki di Jordan Schlipken-Croes. El a asumi e funcion di director pa Aruba Tourism Authority Latino America.
Latino America ta sigui crece
Ronella Croes a comenta cu e region di Latino America a dura poco mas pa recupera despues di e pandemia, compara cu e otro regionnan. Esaki ta algo cu A.T.A. ta mira tambe den desaroyo. Pa e aña ‘ki ta anticipa cu e mercado lo recupera pa 93% compara di locual a ricibi fo’i e region di Latino America na aña 2019. E cifra ta poco menos cu 100% pero e ta bon, mirando cu a dura poco mas. Pa aña 2023 ta proyecta un crecemento di 3%, compara cu 2019 pues no solamente ta recupera completamente pero tambe lo crece riba e aña 2019.
Crecemento stabiel
Latino America ta keda importante mirando cu e ta representa un 8% di e total di bishitante cu Aruba ta ricibi pa aña. Si mira e ultimo decada, 2011 pa 2019, por mira cu e averahe anual di crecemento semper tabata t’ey. A mira un crecemento anual di 4%. Alabes mester realisa cu segun ta crece e region di Latino America, Europa y si Merca sigui crece den termino di reparticion, ta nota 8% di representacion di Latino America.
Tin diferente oportunidad, principalmente pa e mercado di Colombia cu tin hopi movecion pa loke ta trata aviacion. Ta keda na Aruba pa scoge cua ta e maneho oportuno pa loke ta trata e maneho Latino America.
