Un delegacion pisa di Aruba, consistiendo di Aruba Tourism Authority y di Aruba Airport Authority, a pasa henter un siman di reunionnan intensivo na Colombia. A topa cu varios aerolinea y mayoristanan grandi pa e region di Latino America, den un esfuerso pa consolida e mercado aki mas ainda.
Ronella Croes, Chief Executive Officer (CEO) di Aruba Tourism Authority (ATA) a comenta di ta hopi satisfecho cu e reunionnan y participacion di varios otro compania di turismo di Aruba durante e vitrina turistico ANATO 2024.
A cuminsa cu reunionnan prome cu ANATO caba, esey ta custumber di ATA tambe, cu ta cuminsa cu e programa Pre-ANATO. Esey ta encera crea plataforma p’e socionan, a reuni cu e miho bendedonan di Aruba y tur e potencial bendedonan. Esey ya caba Aruba, como destino, ta crea su mesun rueda de negocio y ta crea e oportunidadnan eynan.
Tambe a duna briefing n’e socionan prome cu e feria cuminsa y a lansa un sneak peak di e DocuSeries (documentario) cu lo lansa pronto riba HBO. Keda pendiente di esaki ya cu lo lans’e dia 7 di april. A duna tambe e atencion n’e segmento corporativo. Esey tambe ta hopi importante. Ta hacie debidamente tambe, segun Ronella Croes.
Diaranson a cuminsa cu e bunita momento cu ATA a patrocina FINTEC Colombia. A hacie pa motibo obvio. Riba 200 persona, director, VIP di Colombia, tur hende cu mester t’ey, tabat’ey. Aruba a sobresali eynan como un di esunnan cu tabata visiblemente presente, cu e saludo Real, refiriendo ora SM Reina Maximo a pasa saluda Ronella Croes di Aruba y e delegacion di ATA y AAA. A sigui cu diferente reunion cu e aerolineanan, a lansa vuelo nobo pa Medellin tambe entrante juni e aña aki.
E mercado Latino
Pa e aña aki ta premira cu e mercado Latino/Colombia lo keda mesun cos cu aña pasa, pero asina mes tin un vuelo nobo caba. Por premira cu probablemente lo por surpasa e expectativanan. “Tur cos ta parti di strategia”, segun Ronella Croes. E aerolineanan sa esey tambe. “E strategia ta pa stabilisa Colombia, pero pa crece e mercadonan di Peru, Chile, Argentina y Brasil. Porcierto, e vuelo di Medellin lo conecta bon cu entre otro e mercadonan ey. E no ta bay solamente pa nos bishitantenan di Colombia. E ta un semi-hub basicamente, crea aki. Esey ta netamente parti di e vision di Aruba tambe.”
Tin e aerolinea Wingo cu ta hopi presente domesticamente na Colombia y nan tambe sa di e plannan pa consolida. E idea ta pa Wingo captura mas den otro di e mercado di Colombia y pa uza e hubnan cu ta Bogota, Panama y Lima, pa uza esakinan pa trece e bishitantenan di e otro mercadonan ya menciona. Medellin lo bira un otro oportunidad pa traha riba esaki basicamente. No ta solamente Colombia mester pensa riba dje, pero e vuelo aki lo conecta bon cu otro destinacion clave cu kier trece.
E mercado Europeo
Despues di Colombia a sali un delegacion di ATA pa Europa, pa atende na e bolsa di mas grandi di Europa. “Internationale Tourismus Börse” (ITB) ta unda ta topa no solamente agencianan di biahe di Europa, pero tambe for di rond mundo! Mescos cu ANATO t’esun mas grandi di Latino America, asina ITB ta esun cu ta domina Europa.
Europa lo brinda awo e oportunidad pa conecta, mescos cu a haci na Colombia, pero aworaki dirigiendo p’e mercado di Europa, caminda cu lo tin reunion cu KLM, TUI y diferente otro operado. Sin lubida prensa, caminda ta duna nan atencion, ya cu hopi cobertura ta sali for di nan. Tin un programa separa p’esey.
Manera semper, Aruba ta tuma momento pa reunion cu e socionan local prome cu ITB. For di eynan ta start ITB y full e programa ta cla caba, hasta, manera tur aña, tin nan evento special como Aruba, mas social, unda cu lo rindi homenahe na un persona hopi clave den e mercado di Europa e aña aki.
E mercado Mericano
Pa loke ta Merca, Ronella Croes a splica cu ey ta moviendo hopi bon. Ora papia di Merca, mester corda cu ta un pais hopi grandi y ta partie den diferente region. Tur cu nan mesun cultura y nan mesun afinidad. Merca ta moviendo hopi bon y hopi fuerte!
ATA ta sigui dirigi su mes riba tur mercado, riba e profiel desea. Esun cu tin e poder di compra riba X nivel. Esey ta den tur mercado ta hacie. Pa Merca por ehempel esaki kiermen cu Aruba ta dirigi su mes riba 10% apenas di e populacion, cu no ta hopi. Mester ta hopi dirigi y ta posiciona Aruba como e vacacion di bo soño.
Esaki ta sigui di ta e strategia na Merca. A mira e resultadonan cu ta hopi fuerte. Segun Croes, e tin di haber tambe cu e echo cu loke no mester lubida, cu ora ta posiciona como un marca di renombre, un marca di categoria A, esta premium, e vacacion di soño, tin hopi cu no ta dirigi riba nan, pero tin hopi cu ta aspira e ora pa yega nos.
Ta captura e tipo di segmentonan ey tambe y kisas cu nan ta haciendo uzo e ora di opcion cu tin por ehempel den e sector di short & Vacation rentals. Por ta nan ta opta pa keda na un Airbnb of otro acomodacion cu ta hacie mas accesibel pa nan tambe, pa por logra yega n’e vacacion di nan soño. Ta un combinacion di factor.
“Ta premira un Merca cu lo sigui ta fuerte e aña aki. No obstante e eleccion cu ta na caminda.” Croes ta premira crecemento sigur y lo surpasa probablemente loke tin proyecta, ora cu a entrega nan plan di presupuesto pa 2024, cual nan ta haci na augustus di tur aña.
Tocante Aruba Tourism Authority (A.T.A.)
A funda Aruba Tourism Authority ‘Sui Generis’ dia 1 di januari 2011. Un organisacion independiente, pero den un esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local y internacional.
E industria di turismo di Aruba a mustra un resiliencia y un rendimento impresionante. Entre aña 2011 y 2023, e sector di turismo a mustra un crecemento fuerte. E entrada di turismo, of miho conoci como “Tourism Receipt”, a subi cu un promedio anual di 10%. E cantidad di bishitante cu ta keda tambe a crece na un averahe di 10% anualmente. E entrada pa camber disponibel, conoci como “Revenue per Available Room” (RevPAR), a subi cu un averahe di 11% tur aña. E yegada di e bishitantenan di crucero a mustra un indice di crecemento anual cu un promedio di 24%.
Si analisa resultadonan di aña 2023 compara cu aña 2011, ora ATA a bira un entidad independiente den e esfera publico, por nota cu “Tourism Receipt” a aumenta cu 94%, yegada di bishitante a aumenta cu 43%, “RevPAR” a crece cu 82%, mientras cu yegada di turismo crucero a crece cu 36%. E cifranan aki ta subraya e exito y desaroyo sostenibel di e sector turistico di Aruba, desde cu a funda ATA SG.
A.T.A. ta pone hopi enfasis riba e e modelo di “High Value-Low Impact”, un balans entre di un banda aumenta e balor economico di e bishitante y na otro banda posiciona Aruba como un pais desea y sostenibel. E meta ta pa aumenta entrada pa medio di calidad di turismo en bes di cantidad.
Segun World Travel and Tourism Council (WTTC), ta proyecta cu e contribucion total di biahe y turismo na GDP di Aruba lo alcansa 74% pa aña 2023.
