Durante un entrevista cu CEO di Aruba Tourism Authority, a probecha pa puntra tocante e lansamento reciente di un campaña cu, na nivel local, a genera hopi polemica. Ronella Croes a splica cu, poniendo esey un banda, nan ta sumamente contento cu e resultado te aworaki for di e mercado cu nan a dirigi p’e.
Tambe ta haya elogio for di e sector di mercadeo y relacionnan publico pa e idea briyante cu ta logrando e obhetivo di hala atencion.E campaña di Bring Your Luggage, loose your baggage ta loke ta conoci den e industria como un PR Stunt. E ta algo diseña pa hala atencion, genera un reaccion y yega mas leu den e alcance.
No ta asina cu Aruba ta bay paga pa e maletanan di tur hende di awo te december, Croes ta splica. E nomber ta crea pa asombra y impacta e biaheronan potencial. Den e comunicado di prensa cu ta suplementa e campaña y ta splica cu ta aplicabel solamente pa 500 maleta y ta cubri te na un maximo di suma.
