Minister di Husticia y Asuntonan Social a tene un rueda di prensa riba cifra, pero no a comparti cifra di Veilige Bario’s. Un punto di preocupacion ta keda e problema social, crimen y prevencion bou hoben, di cual a bin cu e programa di Veilige Bario’s.
Parlamentario di RAIZ, Misha Raymond a manda un carta na Presidente di Parlamento, pasobra e tabata desea di haya mas informacion con e proyecto di Veilige Bario’s ta bayendo.
Minister Rocco Tjon a splica cu e proyecto aki ta den pleno ehecucion. E ta enfoca riba tres diferente aspecto di cual e prome ta e parti infrastructural. Ta conoci cu tin diferente, specialmente ora ta papia di iluminacion den e barionan. A cuminsa cu esey na San Nicolas, pero awo ta preparando p’e siguiente fase di cual e mandatario ta kere esey lo ta na Mabon.
San Nicolas conoce 108 punto di luz extra y esey ta un parti di Veilige Bario’s. E parti cardinal di e proyecto Veilige Bario’s ta percura pa rebiba tur e centronan di bario. P’e motibo ey, segun Tjon, aña pasa a firma e MoU cu tur centro di bario y CEDE Aruba.
Henter e plan ta den ehecucion. A tuma diesdos persona den servicio pa tur centro di bario. Na un forma mas uniforma y centralisa aworaki, ta tene cuenta cu tur diferente aspecto. Asina ey por tene mas actividad den e bario.
Luna pasa el a tene reunion cu Daniel Tecklenborg, director di CEDE Aruba. Incluso e mandatario ta kere cu otro luna si tur cos cana bon, e website di Veilige Bario’s lo ta lansa. E centronan di bario mes a scoge p’e nomber di Barionan Unico.
Esaki lo ta accesibel pa henter comunidad. Nan lo sa exactamente ki actividad ta duna, den cua centro di bario, ki dia y orario. E mandatario a sigui expresa cu e actividadnan aki ta amplio y ta basa riba e parti di cultura, deporte, enseñansa. Un punto cu ta trahando pa haci esey mas accesibel, specialmente p’e personanan cu no por paga un bijles, no por paga un bijscholing y por hay’e gratis n’e centro di bario. E proyecto aki ta den pleno ehecucion y ta bou encargo di CEDE Aruba.
