Parlamentario di MAS, Aquanette Gunn, dia 14 di juli 2023, a dirgi un carta di dies pregunta na Minister di Husticia y Asunto Social, Rocco Tjon. E preguntanan ta relaciona cu a institui un ‘Management Team’ pa Instituto Coreccional Aruba.
E parlamentario tabata interesa di haya sa e motibonan pa cual a tuma e decision aki y si a hiba un estudio relaciona cu e maneho di Gino Winklaar, prome cu a yega na tal decision.
Den su contesta e mandatario a indica cu e ta anexa e Ministeriele Beschikking den cual ta duna e motibonan pa cual a dicidi di bin c’un Management Team na Instituto Coreccional Aruba. Motibo pa un Management Team ta basa riba e deseo pa bin c’un centro penitenciario nobo na Aruba.
Pa loke ta e investigacion riba e maneho di Gino Winklaar den su funcion di Director di Instituto Coreccional Aruba (KIA), e mandatario a splica anteriormente, basa riba e deseo di bin c’un centro penitenciario nobo, no tabata necesario pa haci un investigacion riba e maneho cu Winklaar a hiba den e instituto. Si e mandatario a subraya cu e Management Team ta algo temporal.
Relaciona cu e rapport di e Comision di Inspeccion di Husticia di Hulanda riba Aruba su Instituto Coreccional Aruba, e mandatario a informa cu te asina leu cu e ta na altura, e mas reciente rapport di Inspectie Justitie en Veiligheid ta data di maart 2020, en conexion cu e bishita di e Inspeccion na Aruba na november 2019. Den dicho rapport ta para cu e Minister di Husticia, Siguridad y Integracion tabatin hopi plan pa mehora KIA y cu a haci algun trabou di reparacion compara c’un inspeccion anterior. Den e rapport a conclui cu ainda tin varios bottleneck cu mester resolve.
Pa un descripcion cortico di e mehoracion- y bottlenecknan identifica pa e Inspeccion, e mandatario a referi e parlamentario na e comunicado di prensa di e Inspeccion di dia 10 di maart 2020.
Pa mas informacion por lesa e contesta di e mandatario manda na parlamentario Aquanette Gunn.
