Tur aña Biblioteca Nacional Aruba ta trece apertura di su Festival di Buki pa Mucha den forma di un celebracion. Esaki cu un show espectacular presenta pa muchanan di scol cu musica, teatro, canto y baile. Coleganan di dept Audiovisual ta encarga cu audio y filmamento di e produccion y demas trabounan audiovisual. Nan ta produci un videoclip pa promocion y e aña aki tambe nan a traha e podium.
Pa cada tema un colega artista ta diseña un lomba di stage special den cuadro di e tema di biblioteca su Festival. Robert (Robby) Solognier ta e artista cu pa hopi aña caba ta diseña e lomba di e stage pa e ocasion special aki. Cada biaha Robby ta logra crea un ambiente teatral atractivo pa e show. E imahen nan cu Robby ta pinta ta conta un storia. E aña aki nos ta mira amigo y amiga di tur color. Robby Solognier ta traha riba paneelnan grandi cu verf di acryl y ta usa e tecnica di airbrush.
Ademas di e lomba di stage Robby a diseña un background y algun dibuho riba foam y pa e exposicion den hal di biblioteca. E exposicion aki tambe ta den cuadro di festival di buki pa mucha.
