Robert Reeberg ta un ex-docente di scol cu awo ta cu pensioen, su hobby ta musica y ta skirbi hopi cantica pa mucha. El a caba di lansa un coleccion di 18 cantica ‘Canta y Siña’ cu ta siña muchanan tocante e habilidadnan di diferente tema. E canticanan aki ta obtenibel riba un USB card. Maybeline Arends-Croes y su coro Tuti Fruti a yuda Reeberg hopi den pasado, anto e biaha aki atrobe a conta cu nan sosten pa canta e canticanan, cu Ivan Quandus percurando pa areglo, y Reeberg mes a compone e canticanan su letra y musica.
E canticanan ta bay riba diferente tema manera con pa siña muchanan conta for di 1 pa 10, of di 10 bay bek na 0, tin cantica riba siña con pa laba man, robes cu drechi y triangulo cu circulo. E proyecto a dura hopi pa bin den realidad, cu cooperacion di UNOCA for di 2023 unda e muchanan a graba e cancionnan. “Pero mi mester a percura p’e USB card riba cua nan ta bin, cual mi mes mester a percura pa fondo y esey a tarda un tiki mas. Mi ta contento cu SETAR a yuda cu parti di esey tambe,” segun Reeberg.
E USB cards yena cu e canticanan aki ta na benta caba, pa esunnan interesa por bay busca nan riba diferente plataforma manera Youtube, Spotify y mas, por scucha nan riba esey caba. “E canticanan aki ta pa mucha di 4 pa 8 aña.” Reeberg ta gradici Maybeline cu su coro cu semper a yuda, Ivan cu semper tabata t’ey pa sostene den parti di areglo y traha riba canticanan, danki na UNOCA cu a financia ful, y SETAR.
