Celebracion di Dia di Rincon ta den ful swing aya na Boneiro y directamente for di Aruba tabat’ey Rincon Boyz cu a sa di pone un dushi ambiente rib’e tereno di Don Andres cu di e forma aki ta duna bek n’e comunidad Boneriano den caya Industria.
Tirso Coffie, di Rincon Boyz a indica cu nan a sa di pone un ambiente unico aya na Don Andres, algo cu nan no a wak nunca antes. Cada aña e celebracion ta bira mas y mas grandi y ainda falta mas pa bin.
Cu e presentacion di diasabra, Rincon Boyz a cende e mecha pa asina duna inicio n’e gran celebracion aki cual punto culminante lo ta diamars binidero, dia 30 di april. E reaccion di e publico presente tabata grandi.
Hunto cu Rincon Boyz nan tabatin algun invitado y esaki tabata danki na e sponsornan. Ta spera di por haya mas sponsor pa otro aña. Diadomingo nan lo sigui cu e celebracion na Rincon, den e bario Cocorobo, unda cu al menos dies banda lo duna nan presentacion. No solamente di Aruba, pero tambe di Corsou y Hulanda, y di Boneiro mes. Rincon Boyz lo ta mas na cierre di e anochi.
Den nan diesshete aña di existencia, nan a bay Boneiro sigur diescuater biaha.
PARADA
E sorpresa di mas grandi lo ta rib’e gran dia mes, unda cu ta celebra e gran parada en conexion cu e 35 aña di Dia di Rincon. Director di Headlines Group, Mark Benson Denz lo tin e honor di anuncia esaki riba e dia aki.
Rutsel Orman a bisa cu nan tin hopi aña ta bin Rincon, pero e aña aki ta hopi mas. Un celebracion 35 aña ta hunga un rol grandi y tambe e manera cu nan ta presenta, cu nan trailer sigur tabata uno moderno. Zonido tabata na encargo di Elite Productions.
