Partido MEP a anuncia un rato pasa cu Ricky Hoek, candidato number 18 riba e lista di MEP, lo drenta Parlamento. E tabata candidato number 18 den eleccion na juni ultimo y a logra haya 135 voto riba su nomber. E lo reemplasa Ady Thijsen, kende lo baha como parlamentario den e siguiente dianan aki, preparando pa e bay traha na Hulanda y na Belgica.
Ricky Hoek a studia Culturele en Maatschappelijke Vorming (CMV) na Fontys Hogeschool voor Sociaal Werk na Eindhoven, Hulanda y tambe a finalisa su Master in Arts in Social Work & Development na Universidad di Aruba. Hoek actualmente ta e ‘Professional and Society Practice Coordinator’ (coordinador di practica) y docente na Universidad di Aruba pa e estudio di Bachelor in Arts in Social Work & Development. Esaki ta haci cu Hoek ta un profesional prepara riba e area social y di enseñansa.
For di aña 2004 pa 2007 Hoek a traha den e funcion di trahado comunitario na Departamento di Asunto Social. Den e funcion aki Hoek tabata encarga di dirigi un plataforma profesional consistiendo di varios cabesante di scol basico, Wit Gele Kruis, Polis di Bario, dokter di cas y clero den e districto di Santa Cruz, Paradera y Noord. E meta di e plataforma tabata pa den un forma di colaboracion mutuo y estrecho atende e problematicanan social cu ta surgi den cada districto.
For di aña 2007 te cu 2017 Hoek a ocupa e puesto di Director na Asociacion Trabao di Hubentud na Aruba, ATHA. Den e funcion aki Hoek tabata encarga entre otro na ofrece e organisacionnan miembro di ATHA cursonan di desaroyo, fondo pa plan vacacional, proyecto encuanto Derecho di Mucha, jeugdmonitor, curso di Licht Verstandelijke Beperking na e profesionalnan, dirigi plataforma pa persona cu limitacion y dirigi e proyecto Poder di Hubentud. Banda di e area profesional cu Hoek ta traha aden, e ta haci diferente trabou boluntario den comunidad.
Ta ser spera cu Hoek lo por drenta den Parlamento dia prome di december proximo y e tramite nan ta den ehecucion awo.
