A traves di su cuenta di Facebook, Richard Arends a caba di confirma loke 24ora.com a informa di ayera, esta cu e ta retira for di politica. Como tal, e no ta bay aparece riba lista di Partido di Pueblo Arubano AVP pa e eleccion di dia 25 di juni proximo. E publicacion den media social a bin apenas algun minuut atras, mientras cu na Cas di Partido, manera ta di spera, henter dia tabatin movecion rond di e trahamento di lista cu ta bay entrega mañan 3:30 di atardi na Conseho Electoral.
Arends a duna di conoce cu diesdos aña pasa el a inicia un caminda cu, pa circunstancianan di e mundo politico a trece te aki: di consehero, pa minister y – despues di e tuma e paso di drenta politica activamente – pa miembro di Parlamento di Aruba.
“E 12 ultimo añanan no a bay sin sacrificio, tanto personal como familiar. Mi a pone tur mi conocemento, capacidad y experiencia na disposicion di Pais Aruba. Mi ta convenci cu m’a logra haci un diferencia y mi por wak atras cu hopi satisfaccion. Trahando semper di un manera integro y profesional. Na tur momento mi a keda hiba un politica limpi, na nivel y di contenido pasobra ta esey ta loke Aruba merece,” asina el a indica.
Adicionalmente a bisa cu aña 2020 tabata un aña di hopi reflexion, cu hopi ora den famia pensando con e bida lo ta ‘despues di pandemia’. No solamente pa Aruba, pero pa su mes como persona y como profesional. Na momento cu e aña a bolter y nos a drenta e aña di eleccion, aspecto personal y profesional a bira hopi mas relevante.
“Cu e mesun gana, motivacion y curiosidad cu mi a drenta e mundo politico, mi ta sali for di dje. P’esey mi a tuma e decision di no postula mi mes pa e eleccion venidero di dia 25 di juni y explora retonan nobo. Mi kier sigui desaroya mi mes profesionalmente sea den sector publico of priva.”
Por ultimo, Arends a gradici su casa, yiunan, famia, amigonan y votadonan cu a sostene den e caminda aki. Tambe e ta desea esunnan cu ta na turno, hopi exito recordando cu dia 25 partido AVP ta e unico opcion!
