E esfuersonan persistente di Prome Minister mr. Evelyn Wever Croes pa atacha integridad di ex-minister y actual miembro di Parlamento mr. drs. Richard Arends (AVP) a fracasa, segun e conclusionnan di e rapport di e investigacion forensico di e administracion di e empresa estatal Refineria di Aruba (RDA) N.V. E rapport ta indica cu, segun e estadonan di salarionan y administracion bancario, cu no tabatin ningun pago di salario pa Arends den e periodo 2017 te cu 2019.
E rapport ta conclui cu tambe cu Arends no a comete ningun acto ilicito of ilegal. Richard Arends tampoco tabata inscribi na Camara di Comercio como director di RDA. Di e manera aki e investigacion ta refuta e ponencianan riba e Parlamentario cu Prome Minister Wever Croes a trece dilanti na mas di un ocasion. A entrega e rapport diabierna atardi na presidente di Parlamento di Aruba.
E rapport ta confirma e splicacion cu Richard Arends a duna for di prome instante y cu e atakenan personal di parti di Prome Minister Wever Croes tabata completamente infunda. Na momento cu hunta di comisario a entrega rapport di e investigacion forensico na Prome Minister, e la declara cu Richard Arends lo a haci su mes culpabel na actonan ilicito y cu lo a haci un denuncia na Ministerio Publico. E resultado di e investigacion sinembargo ta conclui cu Arends no a comete ningun acto ilicito of ilegal. “Pagonan na e compania di cual mi tabata director y accionista a sosode segun proceduranan existente y un reponsabilisacion adecua. E empresa a traha di manera transparente y no via construccionnan dudoso, manera cu a insinua.”
E corant liga na partido MEP a saca recientemente un articulo sugeriendo cu Richard Arends lo tabata sospechoso den un investigacion penal. Ministerio Publico di su banda a reacciona a raiz di un pregunta haci pa un otro media, cu no tin ningun ex-minister y actual parlamentario sospechoso di ningun investigacion penal, excepto Benny Sevinger den e caso Avestruz.
Como ultimo empuhe pa ainda atacha credibilidad di Parlamentario Richard Arends, Prome Minister Wever Croes a insinua cu e parlamentario lo a tarda e proceso di investigacion. “Esaki no ta cuadra cu berdad. Mi a wordo aserca na mita di 2020 pa coopera cu e investigacion. Mi mes tabatin interes pa elimina tur duda, cualkier malinterpretacion y fake news cu tabata wordo distribui door di esunnan cu kier a atacha mi integridad y profesionalismo. Despues di esey a sigui decenas di pregunta y preguntanan secundario riba hechonan di mas cu 5 aña pasa cu m’a contesta di manera boluntario.”
“Si bo ta drenta un campaña electoral sin ningun logro, no ta posibel pa bo hiba un politica riba nivel y bo ta acudi na atakenan personal y sembra duda den integridad y profesionalismo di bo contrincante. Esaki ta sosode den paisnan grandi, como tambe den paisnan chikito y Aruba no ta un excepcion: awe nos tin un minister presidente, cu ta uza bufete di su mesun tata y tin su mesun primo como presidente di hunta di comisario di un compania estatal, cuestionando mi integridad. Tanten cu bo no publica nada, bo por sigui manipula, pero e rapport ta papia indioma cla”, asina mr. drs. Richard Arends a termina bisando.
