Un di e temanan cu partido RED Democratico a elabora riba dje den nan conferencia di prensa tabata e costo di bida riba nos isla.
Lider di partido RED Democratico, mr. Ricardo Croes, a cuminsa na bisa cu Gobierno di Aruba ta hibando un maneho deficiente y sin vision. Un maneho cruel unda cu e mes ta participa den subi su mesun gastonan y e ta saca e placa for di su pueblo.
Salario minimo na Aruba ta hancra den articulo 9 di e Landsverordering minimumloon y e ta stipula na 1.815,15 y Gobierno a anuncia un aumento cu 78.05 fl. Un subida di 4.3%.
Mas aleu, Croes a sigui bisa cu CBS na juli ultimo a saca di rapport riba pagina 7 cu ta papia di e nivel di subsistencia (bestaansminimum) di kico un famia mester como minimo pa satisface nan nivel di subsistencia. CBS a determina cu aña pasa na juli tabata di AWG. 2.440,- pa un adulto, AWG. 3.172,- pa un adulto cu un yiu, AWG. 3.660,- pa dos adulto, AWG. 4.392 dos adulto cu un yiu y dos adulto cu dos yiu ta AWG. 5.124,-
Si compara esaki cu e minimumloon, por ripara cu tin un deficit di AWG. 724,- pa un adulto. Compara cu e subida di minimumloon cu 4.1% ta un diferencia di casi dies biaha mas grandi cu e aumento di e entrada aki.
