Pueblo di Aruba por a scucha y wak pa su mes con den un rueda di prensa diabierna 20 di october CAft, e supervision financiero oficial pa Aruba, a duna elogio y un bon rapport di e maneho financiero di gobierno, economia di Aruba y riba presupuesto 2024. CAft den su dos consehonan anterior di april 2023 ya a haci esaki di ‘najaarsnota’ 2022 y presupuesto 2023. Den su ultimo publicacionan cu por ser mira riba nan website, mester bisa cu Aruba ta riba e bon caminda. Den palabranan bon dirigi sin argumento politico, president di CAft a duna un splicacion pakico CAft su conclusion ta asina positivo y kico ainda mester tene cuenta cu ne.
Oposicion su mentiranan a keda desenmascara y exponi
Den e entrevista CAft a desenmascara e gañamento di oposicion y Mervin Wyatt-Ras cu a papia di “Lala Land” y ‘ondeugdelijk bestuur’, asina bergonzando nan retorica. Asombroso ta cu apesar di e conclusion positivo di consehonan di CAft y IMF a brinda na parlamento, oposicion ta insisti di mantene un agenda di retorica mentiroso pa confundi e pueblo di Aruba. Video di Profesor. mr. Peter Nicolaï di Tweede Kamer di Hulanda a laga oposicion “blo sunu” riba nan gañamento di RAft y awo CAft a caba di expone oposicion su mentiranan riba presupuesto 2024, economia di Aruba y e maneho financiero di gobierno. Oposicion den desesperacion ta minando su propio credibilidad cada bes mas, specialmente ora cu nan sali inventa storia y ofende gobierno cu ta trahando duro pa progreso di nos pais. E actitud bergonzoso y destructivo aki ta duna pueblo un bon chens pa observa ki oposicion ta dispuesto pa haci pa yega na poder.
Puntonan cu CAft a elogia maneho di Gobierno
(1)-Economia di Aruba a recupera completamente danki na un turismo resiliente.
(2)-Surplus ta bay ta mas cu 1% na 2024. Esaki lo libera miyones pa inverti den nos pais.
(3)-Presupuesto di Aruba ta cumpli cu tur e normanan.
(4)-Inversion den fondonan social ta subiendo y ta invertiendo mas den ayudo social.
(5)-Surplus di AZV y SVB ta algo hopi positivo.
(6)-Presupuesto 2023 y 2024 a wordo entrega na tempo.
(7)-Tin deugdelijk bestuur y landspakket ta progresando mas cu tur otro pais den Reino.
(8)-Tin un crecemento di nos GDP anualmente.
CAft: Mester tene cuenta cu riesgonan
(1)-Mester tene cuenta cu e guera nobo cu a start entre Israel y Hamas, con esaki ta afectando globalmente y localmente.
(2)-Mester sigui wak con e guera entre Rusia y Ukraina ta keda afecta mundo y inflacion global.
(3)-Mester monitoria inflacion global y sigui mitiga inflacion local.
(4)-Mester trata na yega na un miho solucion pa e 6.9% di RAft, sino e lo “verdamp” parti di e surplus di 2024.
Semper ta bon pa cada ciudadano yega na informacion for di e fuente. Scucha e rueda di prensa di CAft pa bo mes y realisa cu e informacion cu mi ta dunando pueblo ta veridico. Tambe por download e consehonan di CAft for di nan website na www.cft.cw y lesa esakinan pa bo mes. Esaki ta e strategia di hopi den oposicion: “Traha video, ataca den prensa, sin prueba, sin consenshi, sin bin trabao y sin haci algo.” Pa Aruba recupera nos mester uni pa pusha nos pais den e direccion corecto. No tin luga pa weganan politico y retorica basa riba mentira. Aruba ta riba e rumbo di recuperacion. Aruba mester politiconan serio, dedica na nan pais y para semper pa e berdad pa con duro e por ta.
