Riba su plataforma social ex-promer minister Mike Eman y su casa Doina Eman a habri e prome dia di aña cu un mensahe cu ta pone enfasis riba cuido di salud. Cu un potret di e pareha Eman trempan dia prome ta cana riba Linear Park nan ta anuncia: “BACK ON TRACK! Despues di un ausencia basta largo di reto cu Doina su salud nos ta back on track riba LINEAR PARK. Gradicido na nos Creador pa salud y un aña nobo. BON AÑA Aruba y principalmente hopi salud y Bendicion”. For di e mas di mil reaccion cu nan a ricibi ta obvio cu comunidad ta comparti nan mensahe.
PREOCUPACION CU SALUD DI NOS HENDENAN
Riba e tema aki Eman ta elabora mas mustrando cu durante aña y fin di aña el a keda hopi preocupa cu e cantidad di persona cu a comparti cu ne e retonan cu nan tin cu salud. Hopi di nan grave y hopi cu kebrante di salud cu ta afecta severamente nan calidad di bida y felicidad. “Bibando continuamente asina cu preocupacion y malestar ta horta un persona y famia di hopi felicidad y trankilidad. E ta pone e persona y famia den un estado continuo di preocupacion, inkietud y incomodidad”. Esaki mester ta un punto grandi di atencion y preocupacion pa nos como representantenan di nos pueblo,” e ex-prome minister Eman a enfatisa.
PREVENCION Y MOVECION
Movecion y come saludabel sigur ta importante pa tene nos hendenan saludabel. P’e motibo aki nos Gabinetenan a promove e temanan aki y construi hopi luga pa nos hendenan por cana, core y distrai nan mes. Tambe a pone enfasis riba scolnan (gezonde scholen) y cu campaña riba importancia di movecion y come saludabel. Lamentablemente, mr. Mike Eman ta bisa, cu e gobierno actual no a sigui riba e rumbo aki y a haci tur cuminda saludabel (fruta y berdura) impagabel pa pueblo.
PAGAMENTO PA REMEDI
E MEDIDANAN DI Gabinete Wever Croes cu cortamento den aporte na AZV tambe tin consecuencia grave den cuido medico na Aruba. Eman ta mustra riba e echo cu e propio dunadonan di cuido a adverti cu e medidanan aki lo conduci na un “klassezorg”. Esunnan cu por paga so lo haya e cuido medico completo. Desafortunadamente, segun e dunadonan di cuido e pashentnan cu tin moda lo haya preferencia ora ta trata tratamento medico, cu consecuencia cu esaki ta trece cu ne pa loke ta calidad y accesibilidad di cuido pa esunnan di menos recurso. Esaki ta locual Gabinete Wever-Croes a causa cu su medidanan den cuido medico.
Ex-prome minister Eman a haci referencia na hopi caso cu a comparti cu ne dje famianan cu no por a paga of cu hopi sacrificio a logra di cera e placa pa paga pa remedi. Tin caso tambe cu el a compronde fo’i personal di Botica cu e personanan no tin placa pa paga y ta bay cas sin e remedi cu nan tin mester pa nan salud y malestar.
DESTRUCCION DI AREGLONAN COLECTIVO
Hopi preocupante mr. Mike Eman ta haya e destruccion dje areglonan colectivo na Aruba, manera cu ta tumando luga den cuido y cu ta manifesta su mes den entrada basico di nos hendenan, den enseñansa y riba tereno laboral pa loke ta siguridad di trabou di e trahadonan.
E erocion di e areglonan pa garantisa un “bestaanszekerheid” pa nos pueblo ta destrui cu un velocidad alarmante. Ya mas un salario minimo no ta alcansa pa un existencia basico, pensioen no ta alcansa pa un existencia cu dignidad, acceso pa scol pa nos muchanan ta conoce mas y mas obstaculo cu schoolgeld cu ta sigui aumenta.
E BON COMUN
Eman ta enfatisa cu su fraccion a presenta un rumbo completamente diferente den su presupuesto alternativa titula “POR OTRO. MESTER TA OTRO” pa salvaguardia e bon comun. E curso alternativa aki pa e bon comun ta boga pa mantencion di areglonan colectivo cu ta ofrece hende derecho riba e servicionan basico manera un bon cuido medico, enseñansa, siguridad di trabou y un entrada p’asina cada ken sin distinccion tin oportunidad igual pa por yega mas leu den bida.
