Riba tur 8 di maart ta celebra Dia Internacional di Hende Muhe, mundialmente, claro, Aruba tambe. Awe ta un dia caminda nos minister-president ta sali y felicita tur hende muhe riba nan dia.
E prome mandatario ta enfoca riba e inclusion y empoderacion di hende muhe. Cu tin cu sostene otro y cu hende muhe awendia ta na mesun nivel cu cualkier otro. Hopi palabra bunita, pero locual a prome mandatario no ta conta ta e nivel con e ta hiba politica henter aña.
E nivel con e ta anda cu contricante politico den parlamento y e sin fin di insulta. Di un banda ta invita mas hende muhe pa join politica y djey ta yama nan pa rabo sushi y su colega Maduro ta estilo frontdesk di parlamento pa wak ken ta bin cu saya cortico of no. Ta yama nan pa loco y hasta comenta cu nan ta un berguensa, mientras ta yama otro pa maribomba y mucho mas.
Ta bon pa pone cos den perspectiva, si di berdad ta empodera hende muhe, tin cu hacie henter aña y no riba Dia Internacional di Hende Muhe so.
