Comunidad Portugues rond mundo ta celebra Dia di Portugal

Dia di Portugal of miho bisa Dia de Camões e das Comunidades Portuguesas, ta wordo celebra tur aña riba dia 10 di Juni.

Aunke ta observe oficialmente solamente na Portugal, e ciudadanonan Portugues, migrante y diasporanan rond mundo ta celebra e dia aki. E fecha ta conmemora morto di e icono nacional literario Luís de Camões riba 10 di Juni, 1580.

Camões a skirbi Os Lusiadas, e poema epico nacional di Portugal, celebrando e historia y logronan Portugues. E poema ta enfoca principalmente riba e exploracionnan Portugues di siglo 15, cu a trece fama y fortuna na e pais. E poema, considera como un di e mas importantenan y miho obranan den literatura Portugues, a bira un simbolo pa e gran logronan di e Imperio Portugues.

Camões tabata un aventurero cu a perde un banda di wowo bringando na Ceuta, a skirbi e poema mientras cu e tabata biaha, y a sobrevivi un naufragio na Cochinchina (region di e actual Vietnam). Di acuerdo na folklore popular, Camões a salba door di a landa cu un brasa mientras mantene e otro brasa riba awa. Ya cu su fecha di nacemento, ta desconoci, ta celebra su fecha di fayecimento como e Dia Nacional di Portugal.

Aunke cu Camões a bira un simbolo pa nacionalismo na Portugal, su morto ta coincidi cu e crisis di sucesion Portugues di 1580. Portugal e tempo ey tabata goberna pa tres generacion di reynan Spaño durante e Union Iberico (1580-1640). Riba dia 1 di December 1640, e pais a recobra su independencia un biaha mas door di expulsa e Spañonan durante e Guera di Restauracion Portugues y coronando Juan de Bragança, como Rey Juan IV di Portugal.

Durante e regimen autoritario Estado Novo den siglo 20, a uza Camões como un simbolo pa e nacion Portugues. Na 1944, na un ceremonia di dedicacion di e Stadion nacional na Oeiras (cerca di Lisboa), e Prome Minister di Portugal, Antonio de Oliveira Salazar a referi dia 10 di Juni, como Dia da Raça (Dia di e rasa Portugues). E nocion di un rasa Portugues a sirbi su proposito nacionalista.

Celebracionnan di Dia di Portugal oficialmente a wordo suspendi durante e Revolucion di e Clavelnan na 1974. E celebracion a resumi despues di 1974 y a expande pa inclui e Comunidadnan Portugues, migrantenan Portugues y nan descendientenan bibando den comunidadnan rond mundo.

Celebracion na Aruba

Dialuna 10 di juni comunidad Portugues na Aruba ta recorda e di 54 celebracion di e fecha aki na Aruba. E gran celebracion aki cu ya ta un custumber di tur aña na Aruba, esta Dia Nacional di Portugal, Dia di Luis Vas de Camoes y dia di comunidad Portugues rond mundo, lo wordo celebra riba dos fecha e aña aki. E celebracion aki a cuminsa na aña 1965 unda sr. Aventura Quimarais a tuma e iniciativa pa e tempo ey celebra Dia di Portugal conhuntamente cu un grupo di Portugues na Aruba. Sr Aventura a nace na Portugal riba dia 9 di maart 1927 y cu su 36 aña el a emigra pa Aruba. Aventura su ofishi tabata welderdo, pero e no tabata un welderdo comun y coriente, e tabata un artista. E tabata miho conoci pa e homber cu tabata biba dilanti di Elmar N.V. riba Wilhelminastraat. E celebracion a inicia cu un marcha saliendo for di su cas den Wilhelminastraat pa Wilhelmina Park. E grupo di Portugues den un forma hopi emocional a bini hunto p’asina gradici Aruba pa e bon aceptacion di e Portuguesnan na Aruba. Aventura Quimarais a fayece riba dia 17 di november 1993, pero te ainda riba e dia aki comunidad Portugues ta record’e.

Portuguesnan ta conoci di ta hende cu ta traha duro y lucha te na final. Nan a contribui na economia di Aruba den añanan 65, 70 y 80. Tambe nan tabata haci trabounan duro y pisa. Portugues tabata busca un futuro pa nan famia y no ta importa e trabou. Pa nan tabata mas importante e dignidad pa tin un trabou y cu un dia nan lo logra. Pa algun di nan, esaki tabata un cos no mucho bon pa haci, pero a sali fo’i nan pais pa traha y gana algo pa bay cas bek cun’e, y no pa keda semper. Esaki tabata e deseo di mayoria di nan. Pero na caminda cosnan a cambia. Asina a sosode cu Portuguesnan poco poco tambe a cuminsa integra den e sociedad di Aruba na unda nan a eherce diferente funcion den comunidad, educa nan famia y ainda nan ta aki y dera na e dushi isla aki Aruba. Nan exito ta sin duda ta capacidad di adapta den diferente ambiente mientras cu na mesun momento mantene bibo y practica e balornan di su origennan. Y p’esey nan ta aki pa gradici Aruba pa acepta nan como parti di e isla. “Nos ta sinti nos mes hopi orguyoso di forma parti di e isla aki y ainda nos ta parti di e desaroyo di Aruba,” ta expresionnan cu semper ta wordo scucha di Portuguesnan.

E dia aki lo ta dedica na un Portugues y asina gradici nan pa nan dedicacion y nan gran esfuerso. Como cu nan a contribui semper na bienestar di Club Portugues y den e trayecto di celebracion di Dia Nacional di Portugal pa esaki ta gradici nan y duna e personanan aki nan honor mereci.

E celebracion di e aña aki

Mirando cu Dia di Portugal ta cay e aña aki riba un dialuna, Fundacion Social Cultural Portugues, of Club Primavera, den boca di pueblo, a celebra e fecha aki riba diasabra 8 di Juni.

Riba e anochi di diasabra, nan tabata tin varios presentacion, entre otro di poesia, baile folklorico, y hasta tres banda Portugues.

Sin keda afo nan tabata tin nan cuminda tipico di Portugal, entre otro e espetada Portugues, pan cu bacalao, etc.

Nelio Gomez da Silva, presidente di e fundacion, a splica cu dialuna si, ta bay tin e acto protocolar den Wilhelmina Park. Y di e manera aki ta invita e colonia Portugues y tambe e Luso-Arubianonan pa bin celebra Dia di Luis Vas de Camoes, cuminsando pa 4’or y mey di atardi.

Mirando cu e comunidad Portugues cu a establece nan mes na Aruba, a haci un gran impacto riba e comunidad, pa e Fundacion Portugues e ta hopi importante. E no ta facil pa mantene un cultura bibo, mirando cu generacion pa generacion ta cambia. Awor aki tin tercer y cuarto generacion caba. Ta importante cu e comunidad mes ta conoci pa ta uno uni y esey ta haci bunita locual ta pa trece e cultura Portugues.

Diasabra por a aprecia e muchanan chikito cu a canta e himno di Portugal y Aruba, cual ta meta pa envolvi nan mas den e cultura Portugues. Mañan cu Dios kier, ta nan ta sigui e tradicion.

Gomez da Silva ta conta cu e mes como mucha, su mayornan tabata trece club, forma parti di training y asina keda envolvi den dje. E idea ta pa sigui di generacion pa generacion, mirando con importante ta y sa di unda nan rais ta bin.

Esey ta e tradicion cu nan ta mantene na Club Portugues, esta Club Primavera cu ta existiendo mas di 40 aña y esey ta importante, mantene bibo, Gomez da Silva a expresa.