Awe Dialuna October 15 na Universidad di Aruba den Garden Room #1 pa 7:00 pm lo tin e captain & referees’ meeting pa e campeonato di kickball. Durante di e reunion lo duna detaye di con e wega lo wordo hunga y particularmente e reglanan di competencia.
E entusiasmo pa e competencia di scolnan basico (eerste y tweede klas) ta grandi y 15 scol ta participa. E campeonato nacional di Kickball lo ta tuma luga ariba 20 y 21 di October cuminsando pa 9 or di mainta na Stadion Frans Figaroa. Durante di mainta lo hunga 6 wega pareu te ora solo bira fuerte y e resto di e weganan lo hunga nan paden ariba e cancha di basketball. E competencia ta dobel eliminacion cu lo permiti tur scol pa hunga por lo menos dos wega.
E weganan ta parti di e proyecto “Aruba Den Movecion” di Circle K Club di Universidad di Aruba y a wordo lansa cu e intencion pa motiva muchanan pa move mas y pa hunga deporte.
Circle K Club di Universidad di Aruba a team up cu bateria Panasonic y organisa e campeonato nacional di Kickball. Pa motiva e scolnan pa participa bateria Panasonic lo premia cu ganadoranan cu Fls. 2000.00 na premio den forma di ekipo di deporte.
E scolnan basico cu ta participa ta inclui Scol Basico Washington, Sta Anna School, Colegio Pastoor Kranwinkel, Mon Plaisir Basis school, Prinses Amalia Basis school, St. Dominicus College, Rosario College, O.L.V. Fatima College, Pius X School, Cacique Macuarima, Colegio Laura Wernet-Paskel, Colegio Sagrado Curason , Colegio Santa Teresita, St. Paulus School/ St. Michael School y Colegio Cristo Rey.
Pa mas informacion:
Circle K Universidad di Aruba; [email protected]
Head of Committee: Lisen Lalwani (telefon 592-7701)
President: Michelle Lont (telefon 560-5297)
