Pueblo henter a celebra Aruba su dia nacional, su himno y su bandera den grandi, manera un bon Rubiano.
Durante dia na Renaissance Market Place tabatin Dino Jump unda cu e muchanan tabata por a hunga, bula y pasa pret sin fin. Tambe tabatin cotton candy y popcorn pa nos chikitonan di cas.
E aña aki tabata e prome aña cu nan a bin cu e Kidtrepeneur, unda cu tabatin varios mucha cu a bin bende nan productonan, manera p.e. brownies. Tabatin mucha cu a traha na mesun armband, nan mesun t-shirt, etc. Sigur algo cu nan lo pensa pa bin cu n’e otro aña pa asina apoya nos muchanan cu nan ideanan.
Pa 3:00pm, e entretenimento a cuminsa cu e dushi ritmo di Robert Jeand’or y Su Solo Banda Show. Esunnan presente a baila, los e pianan, pa asina celebra e dia importante aki cu ta Aruba su dia nacional. Asina Jody-Lynn Desbarida a cuminsa na bisa.
Despues di Robert Jeand’or y su Solo Banda Show, e publico presenta tabata por a disfruta di un bunita show cultural, demostrando nos diversidad cultural. Sigur algo bunita pa presencia.
Mas laat, ya den kibra di anochi, Serghio Jansen y su banda a duna un bunita presentacion deleitando e publico cu su dushi musica. Despues di esaki, un biaha mas, a tene otro show cultural di baile pa asina celebra Aruba su bunita cultura.
E anochi cultural aki a termina c’un tremendo presentacion di Rincon Boyzz, cu a pone e publico presente wapa sin fin.
