Diadomingo anochi na Bochincha a tuma luga e evento di Aruba Ariba. Aki a conta cu participacion di banda local como di Corsou, pero tambe tabatin DJ Decky y Beatz Entertainment pa entretene tur hende. E ambiente tabata den man di Dolce ft Clarck Zalm di Corsou, mientras pa Aruba tabatin DLS cu Shine Music.
Jerrino “Bass” Ridderstap, cantante di DLS, a indica cu Shine Music a habri e anochi, tabatin tremendo ‘happy hour.’ DLS tabata e banda cu a sigui despues di Shine Music, mientras cu Dolce a cera e anochi. Como cu tabata un fin di siman pa celebra, a bin cu e nomber di Aruba Ariba.
Hopi proyecto
E aña aki Jerrino Bass & Friends tin hopi proyecto y nan ta bay sali un tras di otro. Pa loke ta DLS, nan tambe tin nan plannan. E aña aki Aruba ta bay tende hopi di DLS como Jerrino Bass & Friends. Ta bay combina nan hunto, sigur n’e fiestanan tambe. Ya caba tin piesa den e ‘bullpen’, un tras di otro nan ta bay bin pa Aruba gosa y disfruta di diferente genero, banda, artista. Ta complace tur e gustonan. Segun Ridderstap, nan ta bay purba di haci esey den evento. El a gradici tur su sponsornan cu a para su tras y sostene e ideanan cu nan kier trece p’e aña aki. Nan kier trece p’e publico cu gusta sali y baila, gosa di bon fiesta y bon bar, bon ambiente. E sponsornan aki a para bon nan tras.
Graba produccion Nobo
Hopi fanatico ta wardando riba produccion nobo di DLS. Ridderstap a indica cu ya caba DLS a graba un produccion nobo. E siguiente cantica cu ta bay sali ta di Chanti. Pa loke ta Jerrino Bass & Friends ta un proyecto cu ta cushinando.
Ridderstap ta kere cu mester duna e publico loke nan kier. Awendia na Aruba no tin tanto luga pa pone henter un orkesta toca. Pero, asina mes nan kier e ‘taste’ di DLS. E ora ta bay cu Jerrino Bass & Friends, y asina duna un toke di ‘taste’ di DLS, pero cu un estilo diferente.
