Rene Kock, presidente di RED Democratico, a manda un mensahe pa parlamentario Misha Raymond (RAIZ) como docente. Tin dos manera cu un hende ta siña, cu ta door di haci fout of siña di e foutnan di un otro. Kock a señala riba Cannabis Desk y ley di Cannabis na parlamento, of Cannabis cu lo bira pilar economico nobo generando 500 miyon.
A bisa cu lo trata e ley y despues gobierno a cay. “Kico nos por siña di esey? E ley a bay parlamento y no tin fecha pa trat’e, nos a pone fecha pa trat’e, awor ta keda na abo pa conta bo cartanan riba cuanto sosten bo tin den parlamento si of no, of kico t’ey pa spera bo dia nuebe”, segun Kock.
E politico a sigui na splica tocante e situacion di Hydrogen por ehempel, unda a core bay Spaña, tanto badabada, y te ainda nada di Hydrogen of Eagle LNG. “Pero nos ta wak e retorica di campaña a cuminsa caba pasobra diripiente por explora gas, otro compania pa petroleo.” Kock ta manda mensahe na Misha Raymond pa cuminsa conta su cartanan y wak den ki caminda nan ta hibando e. “Esaki ta un draaiboek, nos a siña di dje, pero ta keda na abo kico bo ta bay haci cu ne”, segun Kock.
E politico ta enfatisa cu ta hopi importante ora cu kies un politico di berdad cu tin e pais aki na pecho, no pa un otro partido cu a deriva di un grandi. “Bisa mi cua partido cu a lanta no a deriva di un otro partido. Si bo wak MAS, esey ta tur partido el a pasa den dje caba. Si nos wak esunnan cu a sali di Accion21, partido satelite nan ta.” Bo tin banda di esaki un partido RED Democratico cu a keda ken nan ta. “E ora ta keda na abo pa sa cu campaña a cuminsa caba pa bo cuminsa orienta bo mes kende ta esunnan cu por representa bo. Sin lubida e unico partido cu ningun tabata parlamentario of minister ta den corte dilanti di hues.”
