Na aña 2022 HIAS Aruba y 131 a uni forsa pa reduci e riesgo di violencia contra hende muhe y hende homber y pa promove masculinidad saludabel na e scolnan primario na Aruba.
E colaboracion aki ta basa ariba e extenso experiencia cu 131 tin den implementa e proyectonan similar n’e scolnan primario y secundario riba nos isla, tal como e proyecto ‘Prevencion di Termento na Scol’ y hopi otro charla, proyecto y tayer. Danki na fondo proporciona door di e ‘Bureau of Population, Refugees, and Migration’ (BPRM), e dos organisacionnan aki a desaroya y cuminsa cu implementacion di e proyecto I Stopped It (Ami a par’e) na aña 2023.
Despues cu na aña 2022 a desaroya e proyecto I Stopped It, na 2023 131 a cuminsa cu implementacion di I Stopped It den ocho scol primario na Aruba (un den cada districto). E alumnonan di klas 4, 5 y 6 di e ocho scolnan primario a participa na I Stopped It den aña 2023. E proyecto aki ta preventivo di naturalesa, y ta trata di para violencia entre mucha homber y mucha muhe. E proyecto ta atende cu e problema di violencia, e trato entre mucha homber y mucha muhe, igualdad, y ta promove masculinidad saludabel. Tambe I Stopped It ta trata e tema di termento y discriminacion, y ta stimula empatia entre persona y grupo di persona. I Stopped It ta stimula prevencion di violencia, cu ta un di e puntonan importante di e ‘Beleidsvoornemens’ di Minister di Husticia y Asuntonan Social.
Despues cu Colegio San Hose y Scol Basico Washington a termina e proyecto di I Stopped It. St. Paulus School tawata e siguiente pa participa na I Stopped It. E alumnonan di klas 4, 5 y 6 di St. Paulus School a participa na I Stopped It ariba 12, 14, 20 y 21 di maart. Pa e aña aki ainda lo tin dos otro scol primario cu lo participa na I Stopped It.
Durante 4 sesion nan a haya informacion tocante violencia relacional, violencia relaciona cu genero (violencia di hende homber na hende muhe y/ of violencia di hende muhe na hende homber) y masculinidad saludabel. Durante e di cuater sesion 113 alumno na St. Paulus School a termina I Stopped It cu un certificado como muestra di participacion y conocemento di formanan di violencia y su origen.
Pa mas informacion tocante I Stopped It por tuma contacto cu 131 via nos website: 131.aw, Facebook: https://www.facebook.com/telefon.hubentud/, e-mail: [email protected] of telefon 5886138/ 5884011.
