E conocido Lorenzo van Rijn un biaha mas a pone tur polis riba pia diaranson merdia. Ta parce cu regularmente e ta reta polis den persecucion cu cada biaha ta termina cu autonan di polis kibra. Awe no tabata un excepcion, solamente cu e biaha aki tabatin tres herido y varios auto destrui, entre otro un di recherche, cu ta di gobierno.
Alrededor di 2:00 pm diferente unidad di polis a activa pa purba stop un auto marca Toyota modelo Rav4. Polisnan a constata cu e chauffeur tabata coriendo na un forma iresponsabel y hopi peligroso. Net dilanti Budget Carrental na Camacuri, un otro auto marca Accent a lora na su man robes, despues cu un patruya di polis a pasa cu sirena bay. E auto no a ripara cu tabatin un auto di recherche sin marca di polis y sin sirena tabata bin tur cu tin tras di e patruya, cu consecuencia cu el a dal den e auto particular.
Door di e impacto, dos recherche den e auto di polis civil a resulta herida mientras cu chauffeur di e auto particular tambe a resulta herida. A solicita presencia di dos ambulance na e sitio pa por a transporta e victimanan pa hospital, mientras ambos auto a resulta completamente destrui.
Mientrastanto, un rato despues, otro patruyanan di polis a logra para e Toyota Rav4 cu nan tabata persigui y a bolbe detene e chauffeur iresponsabel. Esaki ta di varios biaha cu ta atende cu e mesun chauffeur aki, di nacionalidad Hulandes, riba su comportacion den trafico. Ta teme cu un di e dianan aki fiscal lo kita su rijbewijs for di dje of kita e vehiculo mirando e desaster cu e ta causa cada bes ora e ta purba scapa for di autoridadnan policial.
