E caso di e morto den auto na Eagle Beach tin atencion di recherche. Autoridad kier sa sigur di kico e hoben Jonathan Alejandro Vizhco Sinchi, a fayece. Su pareha a bati alarma ora a topa cune morto den auto dialuna marduga. E victima no ta un desconoci di Polis.
A yega di detene caba anteriormente pa maltrato serio contra su pareha. E pareha ta biba na Bubali. Nan sa cu e sa bebe hopi. Hopi biaha ora cu autoridad a detene pa maltrato serio contra su pareha, e pareha mes ta keda sin entrega keho contra e homber. Kiermen ora a detene e homber a bay liber bek. Diabierna cu a pasa atrobe e pareha a pleita.
E dama tambe ta di Ecuador mescos e victima. Diabierna despues di pleita, e homber a bandona cas y no a bolbe mas. Ta e propio pareha cual el a pleita cune diabierna a bin haye morto na Eagle Beach. Ta sospecha cu e tin varios ora caba morto. Sigur a calcula ocho ora. Awor mirando su edad jong, fiscal a laga tuma e curpa den beslag. Lo hasi dos cos den e situacion aki. Lo cuminsa chek e sanger pa mira si tin algo robes. Kier mira si por haya rastronan di droga den su sanger.
Lo bay evalua si lo hasi autopsia riba e curpa. E caso ta uno hopi serio cu mester haya claridad total. Y esey mes ta loke autoridad ta buscando. E pareha lo tin cu duna mas declaracion riba e caso aki pa asina evita cualkier duda.
