Rampenbureau tin reunionnan constante pa loke ta asilo politico. Por a tende hopi cos di pazuid. Mundo completo tin wowo riba Venezuela. Rino Hermans, hefe di e departamento, a splica cu pa dia 20 di Mei proximo lo ta bay tin un eleccion atrobe eynan. Di parti di Aruba, e partinan strategico ta cla. E parti tactico tambe. Awor aki nan ta reuniendo bastante, pa motibo cu tin cu haci e plannan operacional. No solamente ta bezig cu Venezuela, pero tin e periodo di horcan cu ta na bista y ta haciendo cu tur e dienstnan frecuentemente pa mira cu den un caso di crisis asina, kico ta e impacto cu e lo haci riba e dienst su mes, cuanto e lo costa nan, cuanto personal. Cu esey ta basa nan mes riba dje como Rampenbureau, pa tur dienst ta na altura di e stakeholdernan kico ta nan input, y purba di coordina miho posibel.
Awor aki ta e parti di detaya e plan den su parti mas preciso cu por pa sa kico ta e impacto cu lo tin riba e comunidad Arubiano.
Loke tin cu tene cuenta cune
Hermans a comenta cu nan tin e plan den tres fase parti. E fase caminda cu ta ricibi y registra nan. Tin e fase di opvang, cu ta bezig ta detaya y tin e fase di repatria nan, cu esey si ta cay den man di minister di asuntonan exterior di reino. E di tres parti tin cu haci’e conhuntamente cu e dienstnan di Hulanda. Ta bezig cu nan tambe riba e parti operacional, keda por escrito. E ora tur hende sa precies kico ta nan rol y Rampenbureau tambe tin un bista si por maneha e situacion cu lo presenta riba nan, ohala cu no, segun Hermans.
Cuanto hende por acomoda
Te asina leu cu si acomoda 250, ta den un crisis cu pasa riba nos cabes. Mester calcula cu 250 ta e capacidad cu tin actualmente cu por maneha e situacion localmente. Mas cu esey e structura lo bay den un problema.
Unda
E luga ta loke ta trahando riba dje den detaye. Tin hopi di e dienstnan cu tin hopi huishoudelijke reglamenten cu tin cu tene cuenta cun’e. E localidad ainda no ta definitivo, di forma cu por present’e na ministerraad y bisa cu esaki ta e localidad cu nan kier bay uza. Esey ainda ta den discusion den e parti operacional pa tene cuenta cu tur e otro factornan di cada dienst. Ainda no a brinda na minister cua ta e tereno indica den un caso cu haya un influx di masa di migracion pa Aruba.
Ken lo carga cu e gastonan
Inicialmente cada ken tin cu carga su gastonan. Aruba no ta capas pa carga e gastonan aki. E ta sobrepasa nos capacidad financiero. Tin algun partner cu gobierno ta bezig cu nan pa mira con lo bay carga esaki financieramente. Pero pa por yega eynan pa mira cuanto e lo ta, ta bezig cu e parti di skirbi e plannan operacional pa mira un bista financiero cuanto e lo bay costa pais Aruba y di forma cu por pidi asistencia financiero internacional.
Kico mester pasa ora nan presenta
Ora cu e hendenan aki registra, nan ta bin sin nada. Ta registra nan, despues tin cu dunanan un luga di keda, di come y e parti higienico ta cay na responsabilidad di Aruba, mirando cu a firma un protocol di asilo. Tin cu cumpli cu e protocol tambe. Riba esey e dienstnan ta trahando riba dje pa detay’e pa tin un miho bista.
Un permiso special
Departamento di DIMAS ta zorg pa esaki. Articulo 19 ta bisa caminda cu nan mag di move y busca trabao mientras cu nan peticion ta den tramite. Si e peticion sali negativo, nan tin cu bandona Aruba. Mientras tanto cu e peticion ta den tramite, DIMAS ta obsekianan un articulo, di forma cu nan por busca un luga di keda y trabao, mientras tanto cu nan papel ta den tramite.
Temporada di espera
For di 2006, djey nan a bay 2013, nan a sigui pa 2016 y awor aki pa 20 di Mei, nan lo bay riba un bista skerpi. Nan lo ta mas atento depende di e resultado di e eleccion ta. Tin desde 2006 cu a monitor e situacion, siguiendo tur e desaroyonan den region, e paisnan bisiña tambe cu Venezuela. Pa e luna di Mei, cu dia 20 ta cercando, ta hopi mas atento kico lo bira e decision cu e pueblo Venezolano lo tuma.
