Den un carta manda na Sabine de Groot cu ta forma parti di e team organisado di Caribbean Climate & Energy Conference (CCEC) entre Aruba y Hulanda, presidente di Rainbow Warriors Core Foundation, Milton Ponson a indica cu a crea un impresion cu e evento aki, lo ta bisto como un esfuerso pareu cu e esfuersonan di Nacionnan Uni, tanto p’e SDGnan como p’e compromisonan di COMNUCC dirigi p’e estadonan chikito insular den desaroyo.
Desde 1992, durante e conferencia di CNUMAD di Rio, a establece e reglanan di wega p’e participacion di e partinan interesa den e tumamento di decision p’e desaroyo sostenibel den capitulo 27: reforsa e papel di e organisacionnan no gubernamental: socio p’e desaroyo sostenibel di Agenda 21.
Fuera di esey, e documento di e SDGnan “2030 E futuro cu nos kier” ta rotundamente cla riba e participacion habri y inclusivo di tur e interesadonan den e tumamento di decision p’e desaroyo sostenibel, sin laga ningun hende atras.
Mayoria di e COP di e tratadonan organisa p’e organismonan di Nacionnan Uni ta habri n’e participacion di e delegadonan di e ONG Observador.
Pero varios persona y ONG a tuma contacto cu nos indicando cu nan a ricibi e siguiente texto como contesta pa purba di inscribi den e conferencia di CCEC23.
“Danki pa boso interes den e Caribbean Climate & Energy Conference 2023.
E conferencia ta riba nivel di gobierno pa gobierno, loke ta nifica cu desafortunadamente no ta habri ningun invitacion pa ningun hende.”
Esaki ta un violacion obvio di e reglanan di wega estableci den e Agenda21, e reglanan di participacion di e Gruponan Principal y Otro partinan interesa y e configuracion di e SDGnan.
Por lo tanto, nos ta exigi un splicacion den nomber di tur e ONGnan di Caribe Hulandes y di sociedad civil mundial.
Den e carta e ta sigui bisa: “Por fabor tene na cuenta cu nos organisacion ta constitui bao di e leynan di Reino Hulandes como un ONG global cu un mandato global completo y registra n’e UN NGO Liaison Office y den e yearbook di e organisacionnan internacional bao di N4814 y como tal nos tin derecho pa sa pakico e conferencia CCEC23 ta a base di invitacion.”
