Rafael Estrada, co-autor di e Rapport Vice, ta un di e personanan cu ta carga e proyecto di Fast Ferry.
E tabata presente durante e firmamento di MoU hunto cu Minister di Transporte, Chris Romero na Cosecha. El a comenta di ta hopi contento cu e por a presencia e firmamento. Manera cu tur e Ministernan envolvi a bisa, e ta un bunita paso padilanti y lo tin un impacto riba desaroyo economico, desaroyo turistico y desaroyo social entre e islanan.
Corsou di acuerdo
Segun Estrada, ta bezig cu e proyecto aki mas cu 8 aña caba y poco poco a haci un paso mas dilanti y awo a dal un paso gigante. Awor aki lo bay tende kico ta e proximo pasonan. Segun Estrada, tanto Corsou y Aruba lo bay purba cu comisionnan mixto pa guia e proceso, cu ta un cos hopi bunita mes.
Tin awor aki e sosten incondicional di tanto Gobierno di Corsou como Gobierno di Aruba.
Fecha tentativo
Tur cos ta depende di varios factor prome cu duna un fecha. Tin cu bay defini kende lo bay ta e operador di e Fast Ferry. Despues mester bin un Public Service Obligation entre e Gobierno di Corsou, Gobierno di Aruba y e operador, pa asina defini kico lo mester bay sosode pa e proyecto aki por bira un realidad.
Reunion
Hopi di e reunionnan ey a tuma luga caba. Awo ta simplemente pa ratifica un ke otro. Por tin cierto cosnan. No sa unda e puerto di Corsou lo ta. Ta spera cu lo ta na Westpunt pa asina e ferry por haci mas buelta pa dia entre Aruba y Corsou. Potencial tin pa haci mas trip pa dia. Estudio cu a haci, ta indica cu tin espacio pa tres trip pa dia entre Aruba y Corsou.
Pasahero
Segun Rafel Estrada, e cantidad di pasahero ta depende di e fast ferry cu lo bin disponibel. Fast Ferrynan ta scars. Na Islas Canarias, e operador lo bay haci un cambio den nan flota cu lo bay bin tres ferry disponibel fin di otro aña y fin di e aña siguiente. Ta spera cu un di e ferrynan aki por bin Aruba y Corsou.
E volumen
E cantidad di pasahero, vehiculo etc. ta varia entre 600, 800 y 1100 pasahero. Na auto por hiba 150 auto y 30 pa 50 truck. Tur cos ta depende di e tipo di fastferry, si ta trimaran of catamaran cu lo bay ta disponibel. No sa cua por ta disponibel.
E trip
Segun Estrada, awor aki na Islas Canarias, cual ta e modelo cu a tuma, e Fast Ferrynan tin un turnaround di menos cu 20 minuut. A bisa aki cu lo bay haci’e den 30 minuut. Esey ta posibel, si bo tuma naturalmente e sistemanan existente cu tin eynan. Si kier bay haci un trip pa Corsou prome cu bo haya e reservacion, ta bay un mensahe pa migracion y duana na Corsou pa puntra si un persona por drenta Corsou. Esey ta pasa den cuestion di seconde. E mesun momento ta bay un mensahe pa duana y migracion di Aruba, puntrando si e persona mag sali for di Aruba. Ora cu tur cos ta OK, y esey ta pasa den cuestion di seconde, bo ta haya un OK pa bo cumpra bo ticket y pa bo biaha.
E firmamento di e MoU ta un paso hopi grandi cu a haci. Awor aki e gobierno di Corsou y Aruba lo bay hiba e proyecto dilanti. Awo ta keda na nan pa Vice guia e proyecto of tin otro hende mas capacita maneha esaki.
Boneiro
Semper a wordo papia pa inclui Boneiro. E proyecto mes ta pa islanan ABC. Ora cu a entrega e rapport, e intension tabata pa tin dos frecuencia pa dia entre Aruba, Corsou, Boneiro, Corsou y Aruba. Den e rapport e tempo ey, direccion di Ports Authority a bisa cu nan no tin acceso na e waf di San Nicolas, cu mester a haci tur kostberekening, saliendo for di Oranjestad. Esey a haci cu e lo tabata bira imposibel pa haci Aruba-Corsou-Boneiro. Sinembargo awor cu ta saliendo for di San Nicolas, esey lo por ta factibel. Awor aki Corsou y Aruba a dicidi cu nan kier sigui padilanti cu e proyecto. Ta supone cu ta hopi facil pa incorpora Boneiro tambe.
